Taldyqorǵanda servıstik ákimdik ashyldy

TALDYQORǴAN. QazAqparat - Taldyqorǵan qalasynda «Open Taldykorgan» front-ofısi jobasynyń ǵımaraty paıdalanýǵa berildi.

Joba «Halyq únine qulaq asatyn memleket» tujyrymdamasyn iske asyrý aıasynda qolǵa alynyp otyr, dep habarlaıdy QazAqparat tilshisi.

«Servıstik ákimdik» jobasynyń qaǵıdalary memlekettik qyzmet kórsetetin memlekettik organdardy bir jerge shoǵyrlandyrý jáne azamattar úshin qolaıly jaǵdaı týǵyzý maqsatyn kózdeıdi. 170 myń turǵyny bar oblys ortalyǵyndaǵy zamanaýı keńsede qala ákimdigindegi bólim ókilderi ornalasyp, 450-den astam qyzmet kórsetetin bolady. Halyq qalanyń ár aımaǵynda ornalasqan bólimderdi izdep sandalmaı, barlyq mamandardy bir jerden taýyp, jumysyn jyldam bitirýge múmkindik alady. Sondaı-aq servıstik ákimdikte memlekettik qyzmetterdi kórsetý barysyndaǵy jemqorlyq táýekelderi tolyqtaı joıylady», deıdi memlekettik qyzmetkerler.