Taldyqorǵanda senim men adaldyqqa negizdelgen erekshe dúken ashyldy
TALDYQORǴAN. QazAqparat - Halyqaralyq sybaılas jemqorlyqqa qarsy kúres kúnine oraı Taldyqorǵanda «Adaldyq dúkeni» ashyldy. Bul dúken Almaty oblystyq qoǵamdyq densaýlyq saqtaý departamentiniń ǵımaratynda ornalasqan, dep habarlaıdy QazAqparat tilshisi.
Almaty oblystyq memlekettik qyzmet isteri jáne sybaılas jemqorlyqqa qarsy is-qımyl departamenti «Jer jannatyn aıalaıyq, jemqorlyqtan arylaıyq!» atty aılyq jarııalady. Bekitilgen josparǵa sáıkes, aılyq aıasynda «Adaldyq dúkeni» jumysyn bastady. Bul dúkenniń basty ereksheligi - satýshysy joq. Saýda ornynda kalkýlıator, tólenetin aqshaǵa arnalǵan arnaıy jáshik ornalasqan. Satyp alýshy qajetti taýardy alyp, óz betinshe qunyn eseptep, qajetti qarajatty jáshikke salyp, qalǵan aqshasyn óz betimen qaıtaryp ala beredi.
«Bul tájirıbeni biz Skandınavııa elderinen alyp otyrmyz. Halyq arasynda sybaılas jemqorlyqqa qarsy dúnıetanym men adaldyq qaǵıdattaryn qalyptastyrýda «Adaldyq dúkeniniń» ashylýy bizdiń qoǵam úshin áleýmettik jaýapkershilik seziminiń tamasha irgetasy bolary sózsiz», - dedi Almaty oblystyq memlekettik qyzmet isteri departamentiniń basshysy Serikbaı Nurǵısaev.
Eshkim satyp alýshylardy baqylamaıdy jáne taýardyń aqshasyn tólemeı alyp ketýine kedergi jasamaıdy. Barlyǵy tolyq senim men adaldyqta negizdelgen. Beınebaqylaý kameralary da, kúzet te joq. Aldaǵy ýaqytta osyndaı «adaldyq alańdary» Almaty oblysynyń joǵarǵy oqý oryndary men kolledjderinde ashylatyn bolady.
