Taldyqorǵanda saıajaılardy jalǵaıtyn 2 kópir salyndy
TALDYQORǴAN. QazAqparat – Taldyqorǵanǵa qarasty eki saıajaıda zamanaýı kópir salynyp, paıdalanýǵa berildi. Bul halyqtyń birneshe jyldar boıy kótergen máselesi bolatyn, dep habarlaıdy QazAqparat tilshisi.
Sebebi, eski kópir aspaly bolǵandyqtan adam ómirine óte qaýipti edi. Kólikti bylaı qoıyp, adam júrgende dirildep, qozǵalatyn.
Máselen Shaıqorǵan saıajaıynda kólik júretin kópir múldem bolmaǵan. Halyq aspaly, jaıaý júrginshiler ótkelimen ǵana júretin. Al ózenniń arǵy betine kólikpen ótý úshin ábden sharq uryp sharlaıtynbyz deıdi, turǵyndar.
«Buǵan deıin bul jerden kólik óte almaıtyn bolǵan. Ar jaqta turatyn kólikter anaý jerdiń túbin aınalyp, týbdıspanserdi aınalyp, ábden sondaı áýrege túsýshi edi.Kópir jaýyn-shashynda teńselip turady. Balalar úshin qorqýshy edik. Baǵymyzǵa qaraı kópirdi salyp, halqymyzdyń ıgiligin oılap, salyp berdi. Basshylarǵa myńda bir alǵysymdy aıtamyn», - dedi Taldyqorǵan qalasyna qarasty Shaıqorǵan saıajaıynyń turǵyny Qýanysh Táshibaev.
Týra Shaıqorǵanjaǵydaı sý jańa kópir Qyzyl tas saıajaıynda da paıdalanýǵa berildi. Al bul halyqtyń osy kúnge deıin paıdalanǵan kópiri shuryq tesikke toly, ústimen kólik júrgende dirildep, úzilip ketetindeı úreı týdyratyn. Endi mine Taldyqorǵanǵa qarasty saıajaılar osylaı kórkeıip keledi.
«Bul kópirler jergilikti turǵyndardyń alańsyz júrip-turýyna qolaıly bolady dep oılaımyn. Biz qalanyń ortalyǵyn ǵana emes, shetki aýmaqtaryn, sonyń ishinde saıajaılardy da kórkeıtý jumystaryna turaqty kóńil bólip kelemiz. Aýyz sý, elektr jaryǵy, jol jáne basqa da ınfraqurylymdar júrgizilip, halyqtyń turmysyna qajetti jaǵdaılar jasalýda. Jeltoqsandaǵy merekeler qarsańynda oblysta kóptegen jańa nysandar ashylady. Sonyń ishinde Taldyqorǵan qalasynda elimizdegi teńdesi joq jabyq júzý basseıni iske qosylady. Kóp balaly otbasylarǵa 200-den astam kottedj úıler beriledi. Osynyń bári turǵyndar úshin, jas urpaqtyń bolashaǵy úshin jasalyp jatyr», - dedi Almaty oblysynyń ákimi Amandyq Batalov.
Aıta keteıik, halyqtyń ıgiligine berilgen Taldyqorǵanǵa qarasty Qyzyl tas, Shaıqorǵan saıajaılaryndaǵy eki kópir 595 mln teńgege salyndy.
