Taldyqorǵanda salyǵy tólenbegen kólikter jappaı tárkilenip jatyr
Taldyqorǵan qalalyq Memlekettik kirister basqarmasynyń májbúrlep óndirip alý bóliminiń basshysy Týrabaev Máýlen Dúısehanulynyń aıtýynsha, máselen sýrettegi Toyota markaly, memlekettik nomeri B 477 FDN kóliginiń bereshegi jarty mıllıonǵa jetken.
«Atalǵan kóliktiń salyǵy 2015 jyldan beri tólenbegen. Jalpy salyq aldyndaǵy bereshegi 500 000 teńge. Jańa ǵana kólikti tárkiledik. Iesi tolyq salyqty tólemeıinshe transport aıyp turaǵynda turady»,- dedi Máýlen Týrabaev.
Vedomstvo ókiliniń málimetinshe, bir ǵana Taldyqorǵan qalasy boıynsha 4102 avtokóliktiń salyǵy tólenbegen. Olardyń qaryzy 161 412 230 teńge. Oblys ortalyǵynda búgin jeke sot oryndaýshylardyń kómegimen kólikter jappaı tárkilenip jatyr. Shara birneshe kúnge jalǵasady.
«Sol sebepti salyq tóleýshilerge memleket aldyndaǵy bereshekti ýaqytynda tóleýdi eskertemiz»,- dep tolyqtyrdy M. Týrabaev.
