Taldyqorǵanda salyǵy 6 jyl tólenbegen djıp aıyp turaǵyna áketildi
Taldyqorǵanda kóliktiń salyǵyn tólemegen azamattyń temir tulparyn tıep áketti
TALDYQORǴAN. QazAqparat - Taldyqorǵanda kóliginiń salyǵyn tólemegen turǵynnyń temir tulparyn tıep áketti. Al jol talǵamaıtyn mashınanyń ıesi mamandardy kóre salysymen taksı otyryp ketip qalǵan, dep habarlaıdy QazAqparat tilshisi.
Kólikti ıesi 2011 jyly alǵan eken. Sodan beri bir rette salyq tólemegen. Alty jyl ishinde onyń qaryzy 1,5 mln teńgege jetken. Tekseris kezinde bul avtokólik bankterdiń birinde kepilge qoıylǵany da anyqtaldy. Endi sot sheshimine sáıkes avtomobıl satýǵa shyǵarylady. Sodan túsken qarajat esebinen memleket aldyndaǵy bereshegi óteledi. Al, qalǵan somasy bankke berilmek.
«Taldyqorǵanda osy sııaqty kóliginiń salyǵyn tólemeı júrgen 10 404 adam bar. Sonyń 5 myńyna salyqty kúshtep óndirý jóninde sot sheshimi shyqqan. Boryshkerlerdiń kóbi zańdy bilmegennen keıin salyq tólemeı jatady. Jalpy, salyq tólemeıtinderdiń basym bóligi turmysy nashar otbasylar», - dedi qalalyq memlekettik kirister basqarmasynyń bólim jetekshisi Arlan Burymbaev.
Jalpy Almaty oblysynda kólik salyǵyn tólemeı júrgenderdiń bereshegi 200 mln teńgeden asqan. Ákimshilik aıyppul kólemi de qomaqty. Quzyrly organdar memleket qazynasyna tólenýi tıis qarjyny óndirý isin kúsheıtip, arnaıy reıdtik tekseris sharasyn jıi uıymdastyryp turmaq.
