Taldyqorǵanda saltanat saraıy paıdalanýǵa berildi
TALDYQORǴAN. QazAqparat - Taldyqorǵanda el ıgiligine saltanat saraıy paıdalanýǵa berildi. Endi jas jubaılar nekelerin osy jerde qııady, dep habarlaıdy QazAqparat tilshisi.
Jańa neke saraıy sáýleti jaǵynan qalaǵa erekshe kórik berip qana qoımaı, azamattyq hal aktilerin tirkep, 8 túrli qyzmet kórsetetin bolady. Búgin eki otbasy saltanat saraıynda alǵashqy bolyp nekesin qıdyrsa, aǵa býyn ókilderi altyn jáne gaýhar toılaryn atap ótti.
«Óte qýanyshtymyz. Árıne, ótinish jasaǵan kezde jańa neke saraıynda nekemiz qıylady dep oılamadyq. Baqyttymyz. Altyn toıymyzdy, gaýhar toıymyzdy osynda ótkizemiz degen úmittemiz», - deıdi taldyqorǵandyq Madııar Erlanuly. Madııar búgin Gúlim esimdi baqyt qusyn qolyna qondyrdy. Qýanysh ıelerin oblys basshysy Amandyq Batalov quttyqtap, jyly lebizin bildirdi.
Jalpy nysan 160 adamǵa laıyqtalyp salynǵan. Al mekemeniń qurylysyna 1.5 mlrd teńgege jýyq qarjy jumsaldy. Esterińizge sala keteıik, Saltanat saraıynyń qurylysy 2016 jyly bastalǵan bolatyn.
