Taldyqorǵanda robototehnıkadan irikteý týrnıri ótti
TALDYQORǴAN. QazAqparat - Taldyqorǵan qalasynda «KazRoboProject» jáne «KazRoboSport» tártipteri boıynsha robototehnıkadan irikteý týrnıri ótti. Jarysqa 9 ben 21 jas aralyǵynda 130-ǵa jýyq robot qurastyrýshy qatysty, dep habarlaıdy QazAqparat tilshisi.
Týrnırdi «KazRobotıks»tálimdik jáne sporttyq robototehnıka federatsııasy, «Jas Otan» jastar qanaty uıymdastyryp otyr. Mundaǵy basty maqsat - Qazaqstan jastary arasynda robototehnıka salasyn damytyp, úzdik sportshylar men jobalardy anyqtaý. Jarys baǵdarlamasynda saıyskerler ár túrli bes baǵyt boıynsha óz jobalaryn usyndy. Olar óndirý jáne óńdeý ónerkásibi, elektr energetıkasy jáne jylý energetıkasy, kólik jáne logıstıka, aýyl sharýashylyǵy, «aqyldy» qalalar.
Taldyqorǵandaǵy bilim jáne ınnovatsııa lıtseıiniń oqýshylary Arsen Toqtamys pen Hamzat Djappýev jarysqa aǵash otyrǵyzatyn robot qurastyryp ákeldi. Olar bul jobasyna 4 aı tyńǵylyqty daıyndalypty. Aıtýlarynsha, adam bir aǵashty otyrǵyzý úshin 30 mınýt ýaqyt jumsaıdy. Al bul tehnıka jerdi ózi qopsytyp qazyp, aǵashty otyrǵyzyp, topyraqty qaıta kómip beredi. Bar joǵy 10-15 mınýtta birneshe adamnyń jumysyn oryndaıdy.
Týrnır jeńimpazdary jáne úzdik ǵylymı joba avtorlary Astanada ótetin robototehnıkadan respýblıkalyq chempıonatqa joldama aldy.
