Taldyqorǵanda retro ánder keshi ótti
TALDYQORǴAN.QazAqparat - Taldyqorǵanda qala kúni merekesi aıasynda retro ánder keshi ótti. Elimizge tanymal estrada juldyzdary kontsertke arnaıy kelip, án shyrqady dep habarlaıdy QazAqparat tilshisi.
Qazaqstan Respýblıkasynyń eńbek sińirgen ártisi Maıra Іlııasova, Qudaıbergen Bekish, Shahızada, Mıras pen Quralaı jáne «Taldyqorǵan áýenderi» halyqtyq, folklorlyq-etnografııalyq ansambliniń ánshileri taldyqorǵandyqtardyń qulaq quryshyn qandyryp, tamyljyta án shyrqady.
Kúnniń salqyndyǵyna qaramastan Qaratal jaǵalaýyna jınalǵan halyq kóp boldy. Juldyzdar Taldyqorǵan jurtshylyǵyn merekemen quttyqtap, ilgeri damý jolyna sáttilik tiledi. Kontsertke jınalǵan ónersúıer qaýym, ásirese aǵa býyn ánshilerdiń ánin tyńdap qana qoımaı, esten ketpes eski de esti ánderdi qosyla aıtyp, bı bıledi. Retro ánderden rýhanı sýsyndaǵan jurtshylyq sharany uıymdastyrýshylar men óner azamattaryna alǵystaryn aıtyp tarqasty.
Aıta ketý kerek, Taldyqorǵanda qala kúnine arnalǵan merekelik sharalar 8-shi qyrkúıekten bastaldy. Túrli shyǵarmashylyq baıqaýlar, sheberlik sabaqtary, retro kontsertter men sporttyq saıystar, tanymal tulǵalarmen kezdesýler, áleýmettik nysandardyń ashylýy, kásiporyndardyń tusaýkeserleri sekildi kóptegen sharalar bıylǵy merekeniń sánin kirgizetin bolady. Al, negizgi mereke 30-qyrkúıekte saǵat 10-00-de qalanyń ortalyǵynan bastalyp, Jastar sport saraıynyń mańy men «Jastar» saıabaǵynda jalǵasady.
