Taldyqorǵanda Qnet kompanııasynyń ókili 6 jylǵa sottaldy
Taldyqorǵan qalalyq sotynda qarjy pıramıdasyn qurý jáne basqarý faktisi boıynsha T.-ǵa qatysty qylmystyq is qaraldy (QR QK-niń 217-babynyń 3-bóligi, 2-tarmaǵy).
Sotpen anyqtalǵandaı, T. 2018 jyldyń jazynda Qnet halyqaralyq kompanııasynyń saıtyna tirkelip, táýelsiz ókil kýáligin alǵan.
Sottalýshy 2019 jyldyń qazan aıynda Taldyqorǵan qalasynda Qnet kompanııasyna jańa qatysýshylardyń 690 000 teńgeden 860 000 teńgege deıin jarna salýy kerek bolatyn qarjylyq pıramıdaǵa azamattardy zańsyz túrde tartqan.
Bul rette T. Qnet seriktestiginiń árbir múshesine apta saıyn 200 AQSh dollary kóleminde tólem jasap turýǵa ýáde bergen.
«Qylmystyq shema boıynsha áreket ete otyryp, árbir qatysýshy jańa qatysýshylardy tartýy qajet boldy, ıaǵnı dıvıdentter qarjy pıramıdasyna jańadan engen qatysýshylardan jasalýy kerek edi.
T.-nyń qylmystyq áreketteriniń nátıjesinde 76 azamat qarjy pıramıdasyna tirkelip, jábirlenýshilerge 61 mıllıon teńgeden astam shyǵyn keltirilgen»,- delingen Jetisý oblystyq sotynyń baspasóz qyzmetiniń habarlamasynda.
Prokýror 6 jyl 8 aı merzimge bas bostandyǵynan aıyrý jazasyn taǵaıyndaýdy surady.
Іs boıynsha jábirlenýshiler keltirilgen shyǵynnyń ótelmegendigin eskerip, qatań jaza qoldanýdy surady.
Al, sottalýshy T. kinásin moıyndamaı, sottan ózin aqtaýdy surady.
T.-nyń jasaǵan qylmysy zań boıynsha 5 jyldan 12 jylǵa deıingi merzimge bas bostandyǵynan aıyrý túrindegi jaza kózdelgen aýyr qylmystar sanatyna jatady.
Sottalýshynyń kinási jáberlenýshiler men kýágerlerdiń aıǵaqtarymen jáne qylmystyq istiń basqa da zerttelgen materıaldarymen dáleldendi.
Asyraýynda kámeletke tolmaǵan eki balanyń bolýyn, alǵash ret qylmys jasaýyn jáne aýyrlatatyn mán-jaılardyń joqtyǵyn eskere otyryp, sot T.-ny kináli dep tanyp, oǵan 6 jyl merzimge bas bostandyǵynan aıyrý jazasyn taǵaıyndady.
Jábirlenýshilerdiń azamattyq talap-aryzdary qanaǵattandyryldy.
