Taldyqorǵanda probatsııa úıi - qanatqaqty jobasy iske qosylmaq
Dóńgelek ústel basyna oblystyq jáne qalalyq prokýratýra mamandary, probatsııa qyzmetiniń ókilderi, jergilikti polıtsııa qyzmetkerleri men jergilikti bılik ókilderi bas qosty. Maqsat - arnaıy esepte turǵan azamattardyń áleýmettik máselelerin sheshý.
«Buǵan deıin bul jumyspen Probatsııa qyzmeti jáne Jergilikti polıtsııa qyzmeti aınalysyp kelgen. Biz solarǵa kómekshi bop, múmkindigin arttyrmaqpyz. Osy oraıda biz 23-mamyrda Halyqqa qyzmet kórsetý ortalyǵynda alǵashqy qabyldaýdy ótkizbekpiz. Ol jerge kelgen buryn isti bolǵan jáne túrmeden shyqqan azamattar óz máselelerine jaýap alatyn bolady» dep atap ótti Almaty oblystyq Prokýratýrasynyń 7-shi basqarma bastyǵy Jandos Iskakov. Aıtýynsha, bundaı jobany aqtóbelik prokýrorlar bastaǵan. Jáne ol óz tıimdiligin kórsetken. Sondyqtan, Almaty oblysynda Taldyqorǵan men Qapshaǵaıda probatsııa úıi - qanatqaqty jobasyn iske qosatyn bolamyz deıdi prokýror.
Aıta ketelik, Taldyqorǵan boıynsha probatsııa qyzmetiniń esebinde turǵan 300-den astam azamat bar. Olardyń áleýmettik máselelerin, ıaǵnı jumysqa ornalastyrý, densaýlyǵyn túzeý, medıtsınalyq kómek alýyn qamtamassyz etýge Taldyqorǵan qalasynyń ákimdigi qoldan kelgenshe qolǵabys etedi. Bul týraly dóńgelek ústelde Taldyqorǵan qalasy ákiminiń orynbasary Márlen Kólbaev aıtty.
Sondaı-aq, jıynda balalar úıiniń tárbıelenýshilerin kámeletke tolǵannan keıin jumyspen qamtý jaıy qozǵaldy. Bul turǵyda da qalalyq ákimdik jan-jaqty qolǵabys etýde.