Taldyqorǵanda polıtsııa qoǵamdyq kóliktegi «qalta urylarymen» kúresti jandandyrdy
TALDYQORǴAN. QazAqparat - Taldyqorǵan qalasynyń polıtsııa qyzmetkerleri «Jas qyran» qoǵamdyq kómekshilerimen birlese otyryp, jyl basynan beri qoǵamdyq kóliktegi qalta urylarymen kúresti dúrkin-dúrkin jandandyryp keledi, dep habarlaıdy QazAqparat tilshisi Almaty oblystyq ІІD baspasóz qyzmetine silteme jasap.
Aıta keterligi, 2016 jyly tártip saqshylary qala kólikterinde júrip, jolaýshylardyń qaltasyna qol júgirtken 43 uryny ustaǵan. Al bıylǵy jyldyń qańtar aıynda jedel sharalardy belsendirý nátıjesinde osy sanattaǵy 18 qylmystyń 11 faktisi izi sýymaı ashyldy.
«Qalalyq avtoparkter basshylaryna, júrgizýshilerge, qoǵamdyq kóliktiń kontrolerlaryna avtobýs salonynda baqylaý kameralaryn ornatý qajettigi týraly usynystar aıtyldy. Jolaýshylarǵa jeke múlikterin suǵanaq qoldardan saqtaý úshin saq bolý týraly habarlamalar jasalýy qajettigine nazar aýdaryldy", - delingen baspasóz baıanynda.
Aıta keterligi, qazirgi tańda polıtsııa qyzmetkerleri qoǵamdyq kómekshilermen birlesip, «urylar jıi júretin» avtobýstar baǵytynda belsendi jumysqa kirisken. Budan buryn da osyndaı urlyqtary úshin jaýapqa tartylyp, esepke alynǵan «urylardyń» fotolary jedel toptarǵa taratylǵan bolatyn.
«Jekelegen kólik marshrýttarynda nysanaly túrde júrgizilgen jumystyń nátıjesinde qalta urlyǵymen buǵan deıin de aınalysyp, kózge túskender anyqtaldy. Olardyń tórteýi qalalyq polıtsııa bólimine jetkizilip, profılaktıkalyq áńgimeler ótkizildi», - delingen baspasóz baıanynda.
