Taldyqorǵanda polıtseıler koronavırýsqa baılanysty qaýipsizdik sharalaryn kúsheıtti
TALDYQORǴAN. QazAqparat – Taldyqorǵanda tártip saqshylary karantın kezinde qaýipsizdik sharalaryn kúsheıtti, - dep habarlaıdy QazAqparat tilshisi.
Taldyqorǵan qalasynda koronavırýs indetin juqtyrý deregi tirkelgenine baılanysty aldyn alý sharalarymen qatar, praktıkalyq sharalar da kúsheıtildi.
«Oblys ortalyǵyna kireberisterde 4 sanıtarlyq beket tur. Qazirgi ýaqytta bekettegi polıtseılerdiń sany artyp, beket jumysyna 40 qyzmetker jumyldyrylǵan. Kólikterdiń belsendi qozǵalysy «Almaty - Taldyqorǵan», «Tekeli - Taldyqorǵan», «Úshtóbe - Taldyqorǵan» sanıtarlyq beketterinde tirkeldi. Degenmen, atalǵan oryndarda kólik keptelisi joq ekenin atap ótý qajet»,- dedi Taldyqorǵan qalalyq polıtsııa bóliminiń bastyǵy, polıtsııa polkovnıgi Asqar Nursapa.
Sanıtarlyq beketterde tártip saqshylary oblys ortalyǵyna kirýge nıetti azamattardyń qalada tirkeýde ekenin tekseredi nemese qalaǵa kirýge berilgen ruqsat qujattaryn qaraıdy. Bas sanıtarlyq dárigerdiń qaýlysy kúshine engen sátten bastap, ıaǵnı 17 mamyrdan búginge deıin 8207 avtokólik pen 18568 azamat tekserilgen.
«Sondaı-aq, indet juqtyrǵan tulǵalar men olarmen baılanysta bolǵandardyń, sonymen qatar provızorlyq, karantındik statsıonarlardyń jáne úı karantınine jatqyzylǵan tulǵalardyń turǵylyqty mekenjaıyn táýlik boıy oqshaýlaý júzege asyrylýda. Basty nazar halyq arasynda karantındik sharalardy saqtaý, onyń ishinde maskany únemi taǵý týraly túsindirý jumystaryn júrgizýge aýdarylyp otyr. Baqtarda, gúlzarlarda reıdter júrgizilip, turǵyndardyń toptalyp júrmeýin qamtamasyz etý sharalary qabyldanýda. Kún saıyn saýda oryndarynda da reıdter júrgizilip, Taldyqorǵan qalasy bas sanıtarlyq dárigeri qaýlysynyń oryndalýy tekserilýde»,- dep tolyqtyrdy polkovnık Asqar Nursapa.
Polıtseıler indettiń jappaı taralýynyń aldyn alý úshin jeke sanıtarlyq qaýipsizdik sharalaryn qatań saqtaýdy jáne karantın erejelerin buzbaýdy suraıdy.
