Taldyqorǵanda polıtseıdi balaǵattaǵan áıel kóshe sypyrýǵa májbúr boldy
TALDYQORǴAN. QazAqparat - Almaty oblysynyń ortalyǵynda 56 jastaǵy áıel qalalyq sottyń sheshimimen 60 saǵatqa qoǵamdyq jumysqa tartyldy. Jazasyn óteýshige QR Qylmystyq kodeksiniń 378-baby 1-tarmaǵyna sáıkes polıtsııa qyzmetkerin qorlady degen aıyp taǵyldy, dep habarlaıdy QazAqparat tilshisi.
«Oqıǵa ótken jyly mamyr aıynda, Taldyqorǵan qalasynda bolǵan. Ýchaskelik polıtsııa ınspektory qoǵamdyq orynda ishimdikke mas kúıde júrgen áıel adamdy ustaıdy. Zańnama talabyna sáıkes tártip saqshysy atalǵan azamatshaǵa medıtsınalyq tekserýden ótý qajettiligin túsindiredi. Degenmen, 55 jastaǵy áıel ýchaskelik ınspektordyń talabyn oryndaýdan bas tartyp, bılik ókilin óz qyzmetterin atqarý kezinde ádepsiz sózdermen balaǵattaǵan», - dep málimdedi oblystyq polıtsııa departamentiniń baspasóz qyzmeti.
Tártip saqshynyń eskertýin elemegen qala turǵynynyń qylyǵyna qatysty ýchaskelik polıtsııa ınspektory tıisti hattama toltyryp, sotqa joldaǵan. Іsti qaraǵan Taldyqorǵan qalasynyń soty A. esimdi 55 jastaǵy qala turǵynyn bılik ókilin qorlaý deregi boıynsha kináli dep taýyp, 60 saǵatqa deıingi merzimge qoǵamdyq jumystarǵa tartý týraly sheshim qabyldady. Sotta aıyptalýshy óz kinásin tolyǵymen moıyndady.
Probatsııa bóliminiń aqparatyna sáıkes, qala turǵyny sot belgilegen 60 saǵattyq jumysty tolyǵymen ótep, qalany tazartý jáne bezendirý jumystarymen aınalysty.
Óńirde sońǵy eki jylda QR Qylmystyq kodeksiniń 378-babymen kózdelgen bılik ókilin qorlaý deregi boıynsha qylmystyq ister sany artyp otyr. Aıta keteıik, óz qyzmetin atqarý kezinde bılik ókilin qorlaýǵa jol bergen azamattar QR Qylmystyq kodeksiniń talabyna sáıkes jaýapkershilikke tartylady.
Atap aıtsaq, 2017 jyly 115 derek tirkelse, 2018 jyly 156 fakti oryn alǵan. Atalǵan faktilerdiń eshqaısysy eskerýsiz qalǵan joq. Barlyǵy boıynsha qylmystyq óndiris qozǵalyp, kináliler jaýapkershilikke tartyldy», - dep atap ótti Almaty oblysy polıtsııa departamentiniń baspasóz qyzmeti.
Almaty oblysynyń polıtseıleri zańbuzýshylyqtardyń aldyn alý maqsatynda QR Qylmystyq kodeksiniń 378-baby eki bólikten turatynyn jáne aıyppul men qoǵamdyq jumysqa tartýdan bastap qyryq táýlikke deıin qamaqqa alý jazasy qoldanylatynyn eskertedi.
