Taldyqorǵanda ózenge batyp bara jatqan 11 jasar bala qutqaryldy
TALDYQORǴAN. QazAqparat - Taldyqorǵan polıtseıleri Qaratal ózenine batyp kete jazdaǵan 11 jastaǵy jasóspirimdi qutqardy, dep habarlaıdy «QazAqparat» tilshisi.
Tártip saqshylarynyń aıtýynsha, 11 jasar Kırıll Knıazevtiń týystary polıtsııaǵa der kezinde habarlasqanynyń arqasynda bala aman qalǵan. Qazirgi tańda jasóspirim din aman, týǵan týystarynyń janynda.
Nan ákelýge ketken balasy úıge oralmaǵan soń Kırılldiń anasy birinshi bolyp ýaıymdaı bastaǵan. Týystary balanyń zattary men jańa satyp alǵan azyq-túlikti Qaratal ózeniniń ústinen ótetin kópirdiń janynan taýyp alǵan. Oqıǵa ornyna shaqyrtylǵan polıtseıler birden izdeý sharalaryna kirisken. Bala ózenniń ortasynan tabyldy, kúshti aǵys ony jaǵadan alysqa alyp ketken.
«Bizdiń patrýldik qyzmetkerlerimiz Aıdar Qarabalanov, Rýslan Tezekbaev pen Jedel áreket etý arnaıy jasaǵynyń qyzmetkeri Nurbol Meǵzam kúshti aǵysqa qaramastan, eki shaqyrym jerdegi kelesi kópirdiń mańynda batyp bara jatqan balany sýdan shyǵaryp aldy», - dep habarlady Almaty oblysy Polıtsııa departamentiniń baspasóz qyzmetinen.
Óz kezeginde Kırılldiń týystary polıtsııa qyzmetkerlerine rızashylyqtaryn bildirdi.
Avtory Hasan Espanov
