Taldyqorǵanda óz-ózin pyshaqtaǵan adam aman qaldy
TALDYQORǴAN.QazAqparat - Taldyqorǵannyń polıtseıleri óz-ózine qol jumsamaq bolǵan 33 jastaǵy azamatty ólimnen aman alyp qaldy. Qazir moıny men qolyn pyshaqtap úlgergen adam aýrýhanada jatyr, dep habarlaıdy QazAqparat tilshisi.
Ómirimen qoshtasqysy kelgen azamat densaýlyǵyna baılanysty psıhıkalyq dıspanserde tizimde turǵany anyqtaldy. Almaty oblystyq Polıtsııa departamenti baspasóz qyzmetiniń málimetinshe, 8 shilde kúni ýchaskelik polıtseılerge er azamattyń óz-ózine qol jumsaýǵa umtylyp jatqandyǵy jóninde habarlama túsken. Oqıǵa ornyna birden ýchaskelik polıtseı Almas Aqyshev pen Berik Iskakov, komandır Marat Abylhamıtov jetken.
«Qolynda as úı pyshaǵy men ot jaqqysh zatty gaz balonnyń janynda ustaǵan azamattan polıtseıler qaýipti zattardy alyp úlgerdi. Biraq psıhıkalyq aýytqýy bar adam moıny men qolyna birneshe pyshaq jaraqatyn salyp úlgergen. Tártip saqshylary birden jedel-járdem shaqyryp, qansyraǵan er adamdy dárigerlerdiń qolyna tapsyrdy. Qazir naýqastyń densaýlyǵyna qaýip tónip turǵan joq. Ol dárigerlerdiń baqylaýynda», dep málimdedi oblystyq Polıtsııa departamentiniń baspasóz qyzmetinen.
Oqıǵa Taldyqorǵandaǵy balalar úıiniń tárbıelenýshileri turatyn jataqhanada bolǵan. Qazir 33 jastaǵy azamattyń ne sebepti sýıtsıdke árekettengeni boıynsha terserý júrgizip jatyr.
