Taldyqorǵanda ótken aıtysta oraldyq aqyn bas júldeni jeńip aldy
TALDYQORǴAN. QazAqparat - Taldyqorǵanda «Rýhanı jańǵyrýǵa, jastyq jigermen» atty respýblıkalyq aqyndar aıtysy máresine jetti. Jyr dodasynda batys qazaqstandyq aqyndardyń asyǵy alshysynan túsip, bas júldeni jáne birinshi oryndy jeńip aldy, dep habarlaıdy QazAqparat tilshisi.
Oraldyq aqyn Muradym Mırlanov bas júldeni qanjyǵalady. Jeńimpazǵa 500 myń teńgeniń sertıfıkaty tabys etildi. Birinshi oryn batys qazaqstandyq Talǵat Myqıǵa buıyrdy. Al ekinshi oryn qos aqyn - Jetisýlyq Jalǵas Sydyqqa jáne Jambyl oblysynyń namysyn qorǵaǵan Əset Dúısebaıǵa buıyrdy. Úshinshi oryndy segizinshi synyp oqýshysy, astanalyq Dıas Tólepbergen jeńip aldy.
Barlyq qatysýshylar júldesiz qalmady. Yntalandyrý retinde aqyndardyń ár qaısysyna 75 myń teńgeden aqshalaı syılyq berildi.
Jalpy búgingi dodaǵa respýblıkamyzdyń 10 óńirinen úzdik jas aqyndar qatysty. Elbasy Nursultan Nazarbaevtyń "Bolashaqqa baǵdar: rýxanı jańǵyrý" maqalasy aıasynda uıymdastyrylǵan saıystyń maqsaty - jastar arasynda ulttyq ónerdiń aıasyn keńeıtý. Aıtysqa Aınur Tursynbaeva, Balǵynbek Imashev, Serikzat Dúısenǵazy, Sara Toqtamysova syndy aıtyskerler tórelik etti.
