Taldyqorǵanda ótken alaman báıgede Qarasaı aýdanynyń sáıgúligi top jardy
TALDYQORǴAN.QazAqparat - Búgin «Taldyqorǵan» ıppodromynda Jeńis kúni merekesine arnalǵan ulttyq at sporty túrlerinen respýblıkalyq jarys ótti. Dúbirli dodanyń kórigin qyzdyrǵan «Alaman» báıgede Qarasaı aýdanynyń tulpary top jardy, dep habarlaıdy QazAqparat tilshisi.
Júıriktiń júırigi synǵa túsken 21 shaqyrymdyq «Alaman báıgede» qarasaılyq Jomart Saıbolatovtyń aty birinshi kelip, 1,5 mln teńgeni qanjyǵalady. Al almatylyq Bekaıdar Japarovtyń jylqysy ekinshi kelip, 1 mln teńgeni jeńip aldy. Úshinshi oryn taǵy da almatylyq Saýran Ahmetjanovqa buıyrdy.
Dúbirli dodaǵa elimizdiń túkpir-túkpirinen júzden astam júırik qatysty. Baǵdarlama boıynsha taı jarys, qunan báıge, top báıge, jorǵa attar jarysy jáne 21 shaqyrymdyq alaman báıge uıymdastyryldy. Sonymen qatar qyz qýý, teńge ilý, kókpar tartý oıyndaryn da kórermender rızashylyqpen tamashalady. Jalpy jarystyń júlde qory - 8 mln. teńge.
