Taldyqorǵanda órtengen páterden 67 jastaǵy er adamnyń máıiti tabyldy
TALDYQORǴAN. QazAqparat - Taldyqorǵanda órtengen páterden 67 jastaǵy er adamnyń máıiti tabyldy, dep habarlaıdy QazAqparat tilshisi.
«7 qańtar kúni keshkisin Taldyqorǵan qalasyndaǵy «Jetisý» shaǵyn aýdanynda №27 kóppáterli turǵyn úıdiń 4 qabatyndaǵy bir bólmeli páterde gaz jaryldy. Órt sóndirý kezinde qutqarýshylar kórshi páterden avtosaty kómegimen eki eresek adamdy qutqardy. Sondaı-aq, 30 adamdy, onyń ishinde tórt balany qaýipsiz jerge evakýatsııalady. Órt shyqqan páterde 1954 jyly týǵan er adamnyń máıiti tabyldy», - delingen Almaty oblystyq TJD baspasóz qyzmetiniń habarlamasynda.
Vedomstvonyń málimetinshe, órttiń kólemi 36 sharshy metrdi qurady. Oqıǵa ornynda Almaty oblysy TJD psıhologteri jumys istedi. Qurylys konstrýktsııalary qıraǵan joq. Biraq, órt shyqqan páter men kireberistiń terezeleri synǵan.
Órt 25 lıtrlik gaz ballonynan kógildir otyn tógilýinen shyqqan degen boldam bar. Alaıda bul úı ortalyq gazben jabdyqtalǵanyn aıta ketken jón.
Oqıǵa ornyna Almaty oblysy TJD kúshteri men quraldarynan 35 qyzmetker, 10 birlik tehnıka, Taldyqorǵan qalasynyń polıtsııa basqarmasynan 8 qyzmetker, 3 birlik tehnıka, Gaz qyzmetinen 7 qyzmetker, 2 birlik tehnıka, sý arnasynan 1 brıgada, 4 jedel medıtsınalyq járdem brıgadasy, elektr jelisinen 1 brıgada, jylý servısinen 2 adam, 1 tehnıka jumyldyryldy.
