Taldyqorǵanda Ortalyq Azııa elderi halyqaralyq teatr festıvali bastaldy
TALDYQORǴAN. QazAqparat - Taldyqorǵanda T.Júrgenovtyń 120 jyldyǵyna oraı «Qazaqstan -Eýrazııa júregi» atty Ortalyq Azııa elderi VII Halyqaralyq teatr festıvali bastaldy, dep habarlaıdy QazAqparat tilshisi.
Festıvalǵa Bashqurtstan, Túrkııa, Túrkimenstan, Qyrǵyzstan, Ózbekstan memleketterinen teatr ujymdary qatysýda. Barlyq qatysýshylar qyzyl kilemmen júrip ótti.
Saltanatty sharanyń ashylýymen KSRO halyq ártisi, Memlekettik syılyqtyń laýreaty, Qazaqstan Teatrlary assotsatsııasynyń tóraǵasy Asanáli Áshimov quttyqtap, jyly lebizin bildirdi.
Aıta ketý kerek, Taldyqorǵanda halyqaralyq festıvaldiń bastalýy shaharda jańa teatr ǵımaratynyń ashylýymen tuspa-tus keldi. Festıvaldi jańa shańyraqqa qonys aýdarǵan Bıken Rımova atyndaǵy drama teatrdyń ujymy Muhtar Áýezovtyń «Aıman-Sholpan» komedııasymen ashty. Halyqaralyq doda 6 qarashaǵa deıin jalǵasady. Osy aralyqta Hasan Ajar óndiristik teatry (Túrkııa Respýblıkasy) «Pıraıe» qoıylymyn, Alp Arslan atyndaǵy Túrkimen ulttyq jastar teatry (Túrkimenstan Respýblıkasy) «Kóroǵly jáne Agaıýnýs» qoıylymdy, M.Gafýrı atyndaǵy Bashqurt memlekettik akademııalyq drama teatry B.Rımova atyndaǵy (Reseı Federatsııasy, Bashqurtstan Respýblıkasy) «Іzdep taptym seni...», B.Qydykeeva atyndaǵy Qyrǵyz memlekettik jasóspirimder teatry (Qyrǵyzstan Respýblıkasy) «Qasqyr ulyǵan tún» syndy osy jáne ózge de elderdiń qoıylymdary sahnalanady.
