Taldyqorǵanda on kúnniń ishinde 44 adam indet juqtyrǵan
TALDYQORǴAN. QazAqparat - Taldyqorǵanda sońǵy on kúnniń ishinde koronavırýs juqtyrǵandardyń sany 44 adamǵa jetti. Sondaı-aq indet buǵan deıin tirkelmegen Qaratal, Kóksý aýdandarynan da shyqty. Bul - Taldyqorǵannyń mańyndaǵy eldimekender, dep habarlaıdy QazAqparat tilshisi.
Sońǵy málimet boıynsha Almaty oblysynda koronavırýs ınfektsııasyn juqtyrǵan 16 adam tirkeldi. Vırýs Taldyqorǵan qalasy boıynsha - 9 adamnan, Qaratal aýdanynda - 2, Qapshaǵaı qalasynda eki jáne bir-bir jaǵdaıdan Kóksý, Eskeldi, Eńbekshiqazaq aýdandarynda anyqtaldy.
Naýqastardyń basym bóligi koronavırýs juqtyrǵandarmen baılanysta bolǵan. Sondaı-aq, indet 7 adamnan vırýsqa tekserilý kezinde anyqtaldy.
Barlyǵy oqshaýlanyp, qazirgi ýaqytta juqpaly aýrýlar bólimine aýystyryldy. Naýqastarmen baılanysta bolǵan 88 adam oqshaýlandy. Epıdemıologııalyq tekserý jumystary qolǵa alynǵan.
Jalpy Almaty oblysynda ınfektsııany juqtyrǵan 278 adam tirkelgen. Onyń 159-y koronavırýstan jazylyp shyqty.
Aıta keteıik, Taldyqorǵanda koronavırýstyń alǵashqy jaǵdaıy 14 mamyrda tirkeldi. Ol kezde indetti juqtyrǵan polıtseıdiń 150-den asa adammen baılanysta bolǵanyn, onyń 85-i óziniń áriptesteri ıaǵnı, tártip saqshylary ekenin habarlaǵan bolatynbyz.
