Taldyqorǵanda obyrdy erte kezeńde anyqtaıtyn ortalyq ashyldy
TALDYQORǴAN. QazAqparat - Taldyqorǵanda Elbasy Joldaýyndaǵy onkologııalyq aýrýlardy erte kezeńde anyqtaý tapsyrmasymen jaǵdaıattyq ortalyq iske qosyldy. Ortalyq - elimizdiń densaýlyq saqtaý salasyn tsıfrlandyrýǵa baǵyttalǵan biregeı joba, dep habarlaıdy QazAqparat tilshisi.
Radıologııalyq-aqparattyq keshen onkologııalyq aýrýlardy alǵashqy kezeńinde anyqtaýǵa múmkindik beredi. Sebebi bul jerge zamanaýı kompıýterlik serverlerge jasandy ınttelekt ornatylǵan. Ortalyq Almaty oblysynyń 13 emdeý mekemesiniń 70-ten astam qondyrǵylarymen tikeleı jalǵanǵan. Jasandy ıntellekt ol jerdegi aqparatty jedel saralap, rentgen sýretinen obyrdyń bar-joǵy, kezeńi týraly naqty aqparat beredi. Máselen adamnyń kózi 2,5 mm-lik jarany kóre alsa, jasandy ıntelekt 1 mm jarany anyqtaı alady. Joba memlekettik-jekeshelik seriktestik negizinde júzege asty. Jańa baǵdarlamany Túrkııa eliniń mamandary qazaqstandyq áriptestermen birlese qurastyrǵan.
«Aýdandyq aýrýhanalardan málimetterdiń bir aqparattyq ortalyqqa jınaqtalýy óńirdiń aýrýhanalaryn sandyq sapaǵa kóshirýdiń biregeı joly. Jasandy ıntellektti densaýlyq saqtaý salasynda qoldaný álemdik trendke aınalyp otyr. Almaty oblysy osy baǵytta jańa belesterdi baǵyndyryp keledi», - dedi Túrkııa kompanııalar tobynyń basqarma tóraǵasy Temel Akgıýn.
