Taldyqorǵanda neonataldy hırýrgııa ortalyǵy ashyldy
TALDYQORǴAN. QazAqparat - Táýelsizdik kúnine oraı Taldyqorǵandaǵy oblystyq kópsalaly balalar aýrýhanasynyń janynan ashylǵan neonataldy hırýrgııa ortalyǵy óz jumysyn bastady. Nysannyń ashylý saltanatyna Almaty oblysynyń ákimi Amandyq Batalov qatysty, dep habarlaıdy QazAqparat oblys ákiminiń baspasóz qyzmetine silteme jasap.
Kópshilikti qýanyshty oqıǵamen quttyqtaǵan Amandyq Batalov memleket qoldaýynyń arqasynda oblysta densaýlyq saqtaý salasyn damytýda, medıtsınalyq qyzmet kórsetý sapasyn arttyrýda birshama jumystar atqarylǵanyn tilge tıek etip, neonataldyq ortalyqtyń ashylýyn sonyń bir aıǵaǵy dep atap ótti:
- Memlekettiń basty merekesi Táýelsizdik kúnine oraı mańyzdy nysandy iske qosyp otyrmyz. Oblysqa jańa týǵan sábılerge, jalpy balalarǵa arnaıy medıtsınalyq kómek kórsetetin osyndaı ortalyq qajet bolatyn. Búgin, mine, sol qýanyshty kúnge jetip otyrmyz. Neonataldy hırýrgııalyq ortalyq qajetti zamanaýı quraldarmen tolyq jabdyqtalǵan. Mundaı ortalyqtar elimiz boıynsha sanaýly ǵana. Mamandar endi osy qural-jabdyqtardy balalar emine tıimdi paıdalanady dep senemiz. Qazir biz Memleket basshysynyń tapsyrmasyna oraı densaýlyq saqtaý salasyn tsıfrlandyrýdy qolǵa aldyq. Bul rette memlekettik-jekemenshik áriptestik tıimdi tetik bolyp otyr. Osy saladaǵy kóptegen jobalar memlekettik-jekemenshik áriptestik negizinde júzege asyrylýda. Olardyń qatarynda oblystyń aýdan, qalalaryndaǵy dárigerlik ambýlatorııalar, emhanalar da bar. Medıtsına ǵylymynyń jetistikteri, jańa qural-jabdyqtardy kásibılikpen tıimdi qoldaný adam ómirin saqtaýǵa jáne densaýlyǵyn nyǵaıtýǵa septesedi dep oılaımyn, - dedi oblys ákimi A. Batalov. Sonymen qatar, kelesi jyly oblystyq kópsalaly balalar aýrýhanasy kúrdeli jóndeýden ótetinin, aýmaǵy abattandyrylatynyn atap ótti.
Jas maman, jańa neonataldy hırýrgııa ortalyǵynyń reanımatolog dárigeri Álıaqpar Bekuly quttyqtaý tileginen keıin óziniń dárigerlik tájirıbesimen bólisti:
- Meniń tájirıbemde jańa týǵan sábıge kúrdeli operatsııa jasaý úshin Almaty, Astana qalalaryna tasymaldaý jaǵdaılary jıi kezdesetin, bul, árıne, úlken qaýip bolatyn. Ondaı kezde árbir saǵat emes, tipti mınýttyń ózi qymbatqa túsedi. Sondyqtan mundaı ortalyqtyń Taldyqorǵanda ashylýy - shynynda da biz úshin úlken oqıǵa. Biz, dárigerler, óz tarapymyzdan sábılerdiń densaýlyǵy men ómirin saqtaýǵa jáne nyǵaıtýǵa bar kúsh-jigerimizdi jumsaımyz, - dedi.
Neonataldy hırýrgııa ortalyǵy 60 tósekke shaqtalǵan, 20 palatasy bar. Reanımatsııalyq bólimde 9 tósek qoıylǵan. Ortalyq jańa ozyq úlgidegi quraldarmen jabdyqtalǵan. Atap aıtqanda, laparoskopııalyq baǵan, beınekolonoskop, fıbrogastroskop, bronhoskop, narkozdyq apparattar, IVL, jańa týǵan nárestege arnalǵan «Jıraf» reanımatsııalyq ústeli, fototerapııa apparattary, kıývezder, reanımatsııalyq tósekter bar. Qazir ortalyqta 5 bala em alyp jatyr.
Jobanyń quny - 896,2 mln teńge. Jańa neonataldy ortalyqtyń mindeti - jańa týǵan sábılerge jáne balalarǵa kórsetiletin medıtsınalyq kómekti jetildirý.
Jalpy Almaty oblysynda medıtsına mamandarynyń biliktiligin arttyrýǵa, olardy qaıta daıarlaýǵa kóp kóńil bólinedi. Bul maqsatqa 2018 jyly jergilikti bıýdjetten 201,5 mln teńge bólingen. Sonyń nátıjesinde óńirdiń medıtsına qyzmetkerleri sheteldiń ozyq klınıkalarynda tájirıbe almasýǵa, belgili klınıkalardyń joǵary bilikti mamandarynan dáris tyńdaýǵa múmkindik aldy. Máselen, 2018 jyly 344 maman Lıtva, Polsha, Ońtústik Koreıa, Túrkııa kadrlarynan dáris aldy.
