Taldyqorǵanda muz aıdyny qashan salynady
«Jetisý oblysy ákimdiginiń aqparaty boıynsha Taldyqorǵan qalasynda muz aıdynyn salý máselesi 2025-2027 jyldary josparlanyp otyr. Onyń aıasynda shaıbaly hokkeıden balalar-jasóspirimder sport mektebin jáne konkımen syrǵanaý sport túrleri (konkımen júgirý sporty, short-trek) boıynsha bólimsheler (sany keminde 4 adamnan turatyn jattyqtyrýshy-oqytýshylar quramy) ashý josparlanýda», - dedi Álıhan Smaıylov jaýabynda.
Sonymen qatar Premer-Mınıstr Mádenıet jáne sport mınıstrligi «Qazaqstan Respýblıkasynda dene shynyqtyrýdy jáne sportty damytý jónindegi 2027 jylǵa deıingi tujyrymdamany bekitý týraly» Qazaqstan Respýblıkasy Úkimetiniń qaýlysy jobasyn ázirlegenin atap ótedi.
«Onda dene shynyqtyrý jáne sport salasyndaǵy memlekettik saıasattyń tıimdi modelin qalyptastyrý úshin dene shynyqtyrý men sportty damytýdyń negizgi kórsetkishteri kózdelgen. Ol ulttyń sporttyq áleýetin biriktirýshi bastama jáne buqaralyq sport pen joǵary jetistikter sportyn qarqyndy damytýdyń basty qozǵaýshy kúshi retinde jumyldyrýǵa arnalǵan. Qaýly jobasy qazirgi ýaqytta memlekettik organdarmen kelisilýde jáne zańnamada belgilengen tártippen Úkimet otyrysyna engiziletin bolady», - dedi Úkimet basshysy.
