Taldyqorǵanda muqtaj jandarǵa taýarlar tegin taratylýda
Áleýmettik dúken qala turǵyndarynan kıim-keshekten bastap, ydys-aıaq, turmysqa qajetti zattar men oıynshyqtarǵa deıin qabyldaıdy. Osylaısha, dúken kúndelikti qoldanysqa qajetti zattarmen tolyǵyp, keıinnen ony muqtaj jandarǵa tegin úlestirýmen aınalysady. Oblysyq Іsker áıelder keńesi sharapatty ispen aınalysyp otyrǵan dúken qyzmetimen tanysyp qana qoımaı, áleýmettik dúkenge kishigirim kómekterin ala kelgen.
«Bizdiń dúken kóp jandarǵa úmit, jylý syılap otyrǵan ortalyqqa aınaldy. Qysqa ǵana ýaqytta dúken ıesi qıyn jaǵdaıda qalǵan jandarǵa qoldaý jasap otyr. Bundaı áleýmettik jobalardy memleket te, halyq ta keńinen qoldaýy kerek dep esepteımin», - dedi Іsker áıelder keńesiniń tóraıymy Mamıla Musabekova.
Dúkenniń negizin qalaǵan Ajar Qydyralınanyń aıtýynsha, áleýmettik dúken qurylǵanyna 10 aıdan asqan. Osy ýaqyt aralyǵynda 200-den astam otbasyǵa kómek berilgen.
«Zattardy, kıim-keshekterdi ózderi kelip ala almaǵan otbasylarǵa jetkizip berdik. Degenmen, kıimderdi birden dúkennen alyp ketetinder kóp. Sondyqtan qorymyz taýsylmas úshin bizge eriktiler men qaıyrymdy jandardyń kómegi qajet. Qala turǵyndaryn qaıyrymdylyq jasaýǵa shaqyrǵym keledi», - deıdi Ajar Qydyralına.
Aıta keteıik, áleýmettik dúken ashqan kásipkerdiń qol astynda eki qyzmetkeri bar. Olar qalalyq jumyspen qamtý bólimi jelisimen jumysqa ornalasqan. Kásipker keleshekte turmystyq zattardy qaıta kádege jaratý boıynsha jańa jobany qolǵa almaq.