Taldyqorǵanda muǵalimniń ólimine sebepker bolǵan 4 jigit sottaldy
TALDYQORǴAN.QazAqparat - Taldyqorǵanda muǵalimniń ólimine sebepker bolǵan tórt jigitke sot úkimi shyqty. Sársen Jurynbaev segiz jylǵa, Erlan Myńbaev tórt jáne Rollan Muratbekovti eki jyl alty aıǵa bas bostandyǵynan aıyrý jazasy kesildi. Al Abaı Isaevqa 4 jyl bas bostandyǵynan shekteý jazasy taǵaıyndaldy, dep habarlaıdy QazAqparat tilshisi.
Qaıtys bolǵan Baqytjan Batyrshaevtyń ákesi Nurmuhanbet Batyrshaev qylmyskerler tym jeńil jazalandy dep narazy. Sot úkimimen kelispeımiz degen jábirlenýshi tarap apellıatsııalyq shaǵym túsirmek. Esterińizge sala keteıik, Baqytjan Batyrshaev esimdi azamatty tórt jigit qaladaǵy dámhanalardyń biriniń aldynda soqqyǵa jyqqan.
Aýyr soqqy alǵan 37 jastaǵy azamat aýrýhanaǵa jetkizilip, eki kúnnen keıin kóz jumǵan. Jábirlenýshiniń zaıyby bul qasaqana istelgen qylmys deıdi.
Tolǵanaı Omarovanyń sózinshe, kúıeýin 5 jigit dámhanaǵa izdep kelip, kek alǵan. Al istiń osynshama nasyrǵa shabýyna onyń tóbeles kezinde dosyna arasha túspegeni sebep bolǵan kórinedi.
Alaıda bes adamnyń bireýi kýágerge aınalyp, 4-eýi qylmystyq jaýapkershilikke tartyldy. 3 jigit «Buzaqylyq», al bireýi «Adam densaýlyǵyna qasaqana zııan keltirý» baptary boıynsha kináli dep tanyldy.
Aıta ketý kerek, Baqytjan Batyrshaev Taldyqorǵan qalasyndaǵy №4 mektepte dene tárbıesiniń muǵalimi bolyp jumys istegen. Onyń artynda jary, eki kishkentaı qyzy jáne ata-anasy qaldy.
