Taldyqorǵanda monsha kesheni órtke orandy
TALDYQORǴAN.QazAqparat - Taldyqorǵanda iri monsha kesheni órtke orandy. Qyzyl jalyn sharpyǵan jerden 35 adam qaýipsiz jerge kóshirildi. Kúıik shalǵandar men ıis tıgender joq, dep habarlaıdy QazAqparat tilshisi.
Qoǵamdyq oryn órtke oranǵanda monshanyń ishinde adamdar jýynyp jatqan. Kezekshi bólimge órt týraly aqparat 11.23-te habarlanǵan. Alǵashqy órt sóndirýshiler brıgadasy 5 mınýt ishinde jetken. Degenmen qyzyl jalyn 1 saǵatta áreń aýyzdyqtaldy. Al 12 saǵat 54 mınýtta tolyǵymen sóndirildi. Monshaǵa shomylýǵa kelip, artynsha aýrýhanaǵa jetkizilgen azamatsha terapııa bóliminde em qabyldaýda.
«Órtenip jatqan monshaǵa keldik. Іshinde túsip jatqan 8 adam bolǵan. Sol azamattardyń bárin shyǵaryp, onyń ishinde qart kisi boldy. Ol kisini kóterip alyp, jedel járdem kóligine salyp jiberdik», - deıdi Jergilikti polıtsııa qyzmetiniń vzvod komandıri Esdáýlet Turǵanbaev.
Al, polıtseıler qutqarǵan 1956 jylǵy azamatsha birden aýrýhanaǵa jetkizilgen. Dárigerler onyń jaǵdaıy qalypty deıdi. Tek azdap qan qysymy kóterilip, shoshynyp qalǵan.
«Banıadan túsip shyǵaıyn dep jatqanmyn ǵoı, sodan keıin shyǵyńyz, shyǵyńyz dedi. Esikten bir kisiler shyǵaryp jiberdi, top bolyp shyqqan kezde aldyma bir bále kelip tústi. Sodan esimnen tanyp qaldym», - deıdi taldyqorǵandyq Merýert Momysheva. 
Tilsiz jaý 850 sharshy metrdi sharpydy. Onymen kúresýge onnan astam tehnıka men 50 shaqty adam jumyldyryldy. Al órttiń neden shyqqany belgisiz.
