Taldyqorǵanda menıngıtten kóz jumǵan balanyń ata-anasy aýrýhanaǵa jatqyzyldy
TALDYQORǴAN. QazAqparat - Taldyqorǵanda 2 jastaǵy bala aýrýhanaǵa jetkizilgennen keıin aınalasy bir jarym saǵattyń ishinde kóz jumǵan. Dárigerler shetinegen bala menıngıtten qaıtys boldy degen aldyn-ala dıagnoz qoıyp otyr. Al mamandar menıngokoktyq ınfektsııa juqtyrǵan bala sońǵy ret ata-anasymen Alakól aýdanyndaǵy Kólbaı aýylyna aýyzasharǵa barǵanyn jetkizdi, dep habarlaıdy QazAqparat tilshisi.
Sol jerde balamen qarym-qatynasta bolǵan 66 adamǵa tolyqtaı tekserý júrgizilgen. Qazir qaıtys bolǵan 2 jas 8 aılyq Aısha Qabdolla esimdi balanyń ata-anasy 11 aılyq balasymen birge aýrýhanaǵa jatqyzylyp, dárigerlerdiń baqylaýyna alynǵanyn jetkizdi. Mamandar ázirge olardyń jaǵdaılary jaqsy ekenin aıtty. Qaıtys bolǵan sábı aýyrǵan sátte ata-anasy jedel járdem shaqyryp, biraq birden aýrýhanaǵa jetkizilmegen. Anasy balanyń ystyǵyn túsirýge ózinshe talpynǵan kórinedi. Ókinishtisi sol, naýqas aýrýy asqynqan kezde ǵana aýrýhanaǵa jedel járdemmen jetken.
«Balanyń máıiti saraptamaǵa jiberildi. Onyń qujattary boıynsha uıǵarym shyǵady. Sodan keıin qyzmettik tekserý júredi. Sol kezde barlyǵy anyqtalady. Eger dárigerler jaǵynan kiná bolatyn bolsa, ol anyqtalady», - dedi Taldyqorǵan qalasynyń óńirlik juqpaly aýrýlar aýrýhanasynyń bas dárigeri Baýyrjan Saýranbaev.
Aıta ketý kerek, sońǵy eki aıdyń ishinde Almaty oblysy boıynsha menıngokoktyq ınfektsııa juqtyrǵan 4 jaǵdaı tirkelgen.
