Taldyqorǵanda menıngıtten qaıtys bolǵan stýdent Almatydan ata-anasyna kelgen
ASTANA. QazAqparat - Búgin Ortalyq kommýnıkatsııalar qyzmetinde QR Bas memlekettik sanıtarııalyq dárigeri Jandarbek Bekshın menıngıtten qaıtys bolǵan 13 adamnyń sońǵysy týraly tolyqqandy aqparat berdi, dep habarlaıdy QazAqparat tilshisi.
«Naýqas A. medıtsınalyq kolledjdiń 3-kýrs stýdenti bolǵan. 2 maýsym kúni menıngokokktsemııa dıagnozymen aýrýhanaǵa túsken. Keshe, 4 maýsym kúni 19:15-te qaıtys boldy. Buǵan qatysty laboratorııalyq zertteýler áli júrip jatyr. Zańnamaǵa sáıkes, bul áli rastalmaǵan jaǵdaı.
Dúnıejúzilik densaýlyq saqtaý uıymynyń laboratorııalyq zertteýleri aıaqtalǵan soń rastalǵan jaǵdaı bolady. Ázirge bul menıngokokk ınfektsııasyna qatysty boljam. Ol (stýdenttiń ómiri - Red.), ókinishke qaraı, suraq astynda boldy. Laboratorııalyq zertteýler eki kúnnen keıin aıaqtalady, sonan soń biz bul menıngıt pe, álde joq pa - anyǵyn aıtamyz. Buǵan deıin Kókshetaýda bir qyz osyndaı kúdikpen (menıngıt - Red.) aýrýhanaǵa túsken. Biraq barlyq zertteýler aıaqtalǵan soń, sonyń ishinde, mı julyn suıyǵyn teksergen soń, dıagnoz alyp tastaldy», - deıdi Jandarbek Bekshın.
Bas sanıtarlyq dárigerdiń sózine qaraǵanda, onyń jumystaǵy, oqýdaǵy, turǵan jerindegi, sonyń ishinde ata-anasynyń turatyn jerindegi jaqyn qarym-qatynas jasaýy múmkin adamdar tirkeýge alynǵan. Olar 10 kún boıy medıtsınalyq baqylaýda bolady. Qazir tıisti antıbıotıktik aldyn alý jumystary júrgizilýde.
J. Bekshın, jigit Almatyda turǵandyqtan, onymen jaqyn qarym-qatynasta bolǵandar da sol jerde dep boljap otyr. Al Taldyqorǵanǵa naýqas azamat ata-anasyn kórý úshin kelgen.
«Jigitti qalalyq kópbeıindi aýrýhanaǵa jatqyzǵan. Ol aýrýhanada menıngokokk ınfektsııasymen aýyrǵandarǵa arnalǵan 9 tósekoryn bar. Naýqastardy, Qaskeleńge nemese basqa jerge sendelip júrmeýi úshin, sol jerge jatqyzýǵa bolady. Bul eń jaqyn emdeý mekemesi. Osyndaı jaǵdaılarda eń jaqyn mekemege jetkizý úshin biz barlyq aýrýhanalarda kabınetter ashyp, arnaýly tósek-orynmen jabdyqtadyq», - deıdi Jandarbek Bekshın.
