Taldyqorǵanda menıngıtke shaldyqqan balanyń jaǵdaıy jaqsaryp keledi
TALDYQORǴAN.QazAqparat - Taldyqorǵandaǵy №1 balabaqshanyń tárbıelenýshisi menıngıt aýrýyna shaldyǵyp, aýrýhanada jatyr, dep habarlaıdy QazAqparat tilshisi.
Almaty oblystyq densaýlyq saqtaý basqarmasynyń ana men bala densaýlyǵyn qorǵaý bóliminiń basshysy Leıla Serikbaeva aýrýhanada em qabyldap jatqan balanyń jaǵdaıy qalypty ekenin aıtty.
«2012 jylǵy balaǵa menıngıt dıagnozy qoıyldy. Jaǵdaıy kúnnen-kúnge jaqsaryp keledi. Ystyǵy tústi. Bala tamaqtana bastady. Qazirgi tańda Taldyqorǵandaǵy №1 balabaqsha jumysyn jalǵastyryp jatyr. Tárbıelenýshileri men qyzmetkerleri kúndelikti tekseristen ótedi. 249 baladan synama alyndy. 58 qyzmetkerden analız eki márteden alyndy. Barlyq jaǵdaı qatań baqylaýda. Al 30 maýsym kúni dál osy balabaqshanyń tárbıelenýshisi aýyryp, aýrýhanada kóz jumǵan bolatyn. Naqty balanyń neden qaıtys bolǵanyn ázirge aıta almaımyz. Biraq aldyn ala boljam boıynsha menıngokoktsemııanyń jedel formasy degen dıagnoz qoıyldy», dedi Leıla Serikbaeva.
Sonymen qatar basqarma ókili, qazirgi tańda balabaqshaǵa karantın jarııalanǵanyn málim etti.
«Barlyq ata-analarǵa jáne osy mekemeniń qyzmetkerlerine balalardy ózge mekemege aýystyrýǵa bolmaıtynyn eskerttik. Aıta keteıin, osy balabaqshanyń balalary kúndelikti tekseristen ótip turady», dedi ol.
Al qalalyq ákimdik feısbýk jelisindegi paraqshasynda osy jaıtqa baılanysty resmı túrde málimdeme jasaǵan.
Búginde áleýmettik jelilerde Taldyqorǵandaǵy balabaqshalardyń birinde kishkentaı sábı kóz jumdy degen qaýeset tarap júr. Aqparattyń aq-qarasyna toqtalyp ótelik. 30-maýsym kúni Taldyqorǵandaǵy Almaty oblystyq balalar aýrýhanasynyń jansaqtaý bóliminde taldyqorǵandyq búldirshinniń kóz jumǵany ras. Biraq, balabaqshada emes, aýrýhana ǵımaratynda.
«Balabaqsha jasyndaǵy búldirshindi tańerteńgi tekserý kezinde eshqandaı derttiń belgisi bolmaǵan. Túski uıqydan keıin, ıaǵnı balalar úıge qaıtar ýaqytta balanyń qyzýy kóterilip turǵany baıqaldy. Dereý, anasyna habarlasyp, balanyń densaýlyǵy bolmaı turǵynan aıtyp habarlastyq. Ári, dene qyzýyn túsiretin dári berip, balaǵa barynsha kómek jasadyq» deıdi balabaqsha meńgerýshisi.
Onyń aıtýynsha, balany anasy saǵat 18-20-lar shamasynda alyp ketken. Qyzýy qaıta kóterilgen soń da anasy dári bergen. Túngi úsh jarymdar shamasynda balanyń qyzýy qaıta kóterilgen kezde anasy jedel járdem shaqyrtyp, balany oblystyq balalar aýrýhanasyna jetkizgen. Munda da, balaǵa jan-jaqty kómek kórsetilgen. Biraq, saǵat 4-20-lar shamasynda sábıdiń ómiri úzilip ketti.
Oqıǵa bolǵan kúni Taldyqorǵan qalalyq Qoǵamdyq densaýlyq saqtaý basqarmasynyń mamandary balabaqshaǵa baryp, naýqastan kóz jumǵan balamen qatynasta bolǵan barlyq baladan menıngıt juqpasyna bakterıologııalyq jaǵyndy arqyly synama aldy. Taldyqorǵan qalalyq emhanasynyń mamandary baqshadaǵy barlyq qyzmetkerler men balalardy arnaıy medıtsınalyq baqylaýdan ótkizdi. Baqshaǵa kelmeı qalǵan balalardyń úılerine baryp, synamalar alyndy. Saraptamanyń qorytyndysy áli tolyq daıyn emes. Aldyn ala málimetter boıynsha, tekserilgen balalardyń birinen menıngıt juqpasy anyqtalǵan. Qazir bala aýrýhanada jatyr. Dárigerler, búldirshinniń densaýlyǵy qalypty ekenin aıtyp otyr. Al, qyzmetkerlerden dert anyqtalmady.
«Menıngıtke qarsy is-sharalar qalanyń barlyq balabaqshalarynda júrgizilip jatyr. Jaǵdaı baqylaýda. Ata-analardyń alańdaýyna esh negiz joq»,- deıdi qalalyq bilim bóliminiń basshysy Jandos Joldyhanov.
Oqıǵa Taldyqorǵandaǵy № 1 balabaqshada bolǵan. Kóz jumǵan sábıdiń aty-jóni Mahmut Arystanbek. Qazaǵa oraı Taldyqorǵan qalasynyń ákimdigi marqumnyń týǵan-týystaryna kóńil aıtady. Berik bolyńyzdar!.
«Oqıǵa týraly resmı málimet osyndaı. Áleýmettik jelilerde shyndyqqa janaspaıtyn ártúrli aqparat taratyp, turǵyndardy úreılendirip júrgenderdi QR Qylmystyq kodeksi men Ákimshilik quqyq buzýshylyqtar týraly Kodeksiniń talaptaryna sáıkes jaýapkershilikke tartatynymyzdy eskertemiz! Árkim óz sózi úshin jaýapty!», delingen qalalyq ákimdiktiń áleýmettik jelidegi resmı paraqshasynda.
