Taldyqorǵanda «Men Qazaqpyn» mega jobasyna irikteý ótip jatyr
TALDYQORǴAN.QazAqparat - Taldyqorǵanda «Men Qazaqpyn» mega jobasyna irikteý kezeńi ótip jatyr. Óner dodasyna Almaty oblysynan 18 ben 40 jas arasyndaǵy 52 ónerpaz qatysýda, dep habarlaıdy QazAqparat tilshisi.
Ulttyq qundylyqtarymyzdy ulyqtap, rýhanııatymyzdy jańǵyrtatyn baıqaý án, terme jáne kúı atalymdary boıynsha úzdikterdi anyqtaıdy. Máselen dástúrli ánshiler arasynda 21 ónerpaz baǵyn synaýda. Olardyń qatarynda Beıbit Musa, Quralaı Shaıahmetova, Arafat Iskakov, Gúlnur Nurasylova, Álibı Bekaıdarov syndy Jetisý án-jyr mektebin nasıhattaýshylar qatysýda. Sonymen qatar, «Terme» nomınatsııasy boıynsha 11 úmitker bolsa, al «Kúı» nomınatsııasy boıynsha 20 adam ózara baq synaýda.
Ulttyq óner tórine jańa esimderdi shyǵaryp, asyl qazynamyzdy halyqaralyq deńgeıde nasıhattaıtyn aýqymdy telejoba Elbasynyń «Bolashaqqa baǵdar: rýhanı jańǵyrý» atty baǵdarlamaly maqalasyndaǵy tapsyrmalardy oryndaýǵa baǵyttalyp otyr.
Almaty oblysynan 52 úmitkerdiń tek úsheýi ǵana respýblıkalyq baıqaýǵa joldama alyp, Jetisýdyń namysyn qorǵaıdy. Olar «Qazaqstan» Ulttyq telearnasynyń tikeleı uıymdastyrýymen qolǵa alynǵan «Men Qazaqpyn» televızııalyq mega jobasyna qatysady.
