Taldyqorǵanda memlekettik mekemeni aldap, 162 mln teńge urlaǵan úsh seriktestik basshysy sottaldy

TALDYQORǴAN. QazAqparat – «PIK» qyzmetin avtomattandyrýdy baǵdarlamalyq qamtamasyz etýde aldaý jolymen urlyq jasaý faktisi boıynsha sotqa deıingi tergep-tekserý aıaqtaldy, dep habarlaıdy QazAqparat Qarjylyq monıtorıng agenttigine silteme jasap.

Tergep-tekserýdi oblystyq UQKD men QMA Jetisý oblysy boıynsha departamenti júrgizdi. Anyqtalǵandaı, úsh JShS «Taldyqorǵan qalasynyń aqparattyq-taldaý ortalyǵy» kommýnaldyq memlekettik mekemesimen 162 mln teńge somasyna «PIK» qyzmetin avtomattandyrýdy baǵdarlamalyq qamtamasyz etý qyzmetin memlekettik satyp alý týraly shart jasasqan.

Baǵdarlama basqarý organdarynyń (PIK) qyzmetin avtomattandyrýǵa, basqarýshy kompanııalardyń qyzmetin jáne qalanyń turǵyn úı qorynyń jaı-kúıin baqylaý boıynsha ákimdiktiń mindetterin sheshýge, sondaı-aq turǵyn úı qatynastaryna qatysýshylardyń ózara is-qımylyna arnalǵan.

Alaıda, olar jumys istemeıtin baǵdarlamalyq ónimdi jetkizgen, osylaısha kommýnaldyq memlekettik mekeme qyzmetkerlerin aldaý jáne olardyń senimin teris paıdalaný arqyly qylmystyq quqyq buzýshylyq jasaǵan.

Sotqa deıingi tergep-tekserý barysynda keltirilgen 162 mln teńge zalal somasy tolyq óteldi.

Sot úkimimen úsh JShS basshysy kináli dep tanyldy, olarǵa 5 jyl merzimge bas bostandyǵynan aıyrý, 5 jyl merzimge memlekettik satyp alýǵa qatysýǵa baılanysty qyzmetpen aınalysý quqyǵynan aıyrý men ortasha qaýipsizdiktegi qylmystyq-atqarý júıesi mekemesinde jazasyn óteý túrindegi jaza taǵaıyndaldy.