Taldyqorǵanda memleketke 21 mln teńge shyǵyn keltirgen brakonerler ustaldy
TALDYQORǴAN.QazAqparat - Almaty oblysynda memleketke 21 mln teńgeden astam shyǵyn keltirgen brakonerler ustaldy. Ońaı oljaǵa kenelgisi kelgender týra Taldyqorǵanǵa kireberis tusta qolǵa tústi, dep habarlaıdy QazAqparat tilshisi.
Zańsyz balyq aýlaǵandar tórt jarym tonnaǵa jýyq kókserke balyǵyn Sarqan aýdanyndaǵy Muqan Tólebaev aýylynan ákele jatqan. Úshtóbedegi balyq zaýytyna ótkizýdi maqsat etkender ózderin tek «jetkizýshimiz» dep aqtaldy. Endi bul istiń basynda kimderdiń turǵany anyqtalyp, ákimshilik jaýapkershilikke tartylmaq. Al tárkilengen balyq Qaratal aýdanyndaǵy zaýytqa ótkizilip, túsken qarjy memleket qazynasyna quıylady.
«Búgingi kúnde Almaty oblysy boıynsha balyq aýlaýǵa lımıtter berilmegen. Osyǵan baılanysty munda ár organnyń ókili júrgendikten bul balyqtardy alyp kele jatqandyǵy zańsyz ekendigine kózimiz jetip tur. Bul 2019 jylǵy ekinshi oqıǵa. Aldynda eki 50 keli balyqty tárkiledik. Ol jerde ákimshilik zańbuzýshylyqqa baılanysty 10 mln teńgeden astam qarjy memlekettiń paıdasyna tólendi», - dedi Almaty oblysynyń tabıǵı resýrstar jáne tabıǵatty paıdalaný basqarmasy janýarlar dúnıesin qorǵaý jónindegi jedel qyzmeti mekemesiniń dırektory Qaırat Aqashev 
Mamandardyń aıtýynsha, tórt jarym tonnaǵa jýyq balyqtan memleketke 21 mln 737 myń 22 teńge shyǵyn keltirilgen. Al zańsyz aýlanǵan balyqty satpaqshy bolǵandardy Almaty oblystyq janýarlar dúnıesin qorǵaý jónindegi jedel qyzmet arnaıy reıd barysynda ustady. Brakonerlerdi quryqtaýǵa jol saqshylary da kómektesti.
