Taldyqorǵanda memqyzmetshiler, jýrnalıster, sportshylar men ártister páterdi zańsyz alǵan – oblys ákimi
«Túrli sebepterge baılanysty 2010 jyldan bastap Taldyqorǵan qalasynda úı alý úshin kezek kútkender sany 15 myńǵa jýyqtady. Sońǵy 3-5 jylda jeke turǵyn úı qurylysyna birde-bir jer ýchaskesi bólingen joq. Budan basqa, barlyq óńirler 2016-2017 jyldardan bastap «KEZEKTE» elektrondyq bazasynyń jańa tártibimen jumys isteı bastady. Al bizdiń óńirde, ıaǵnı Taldyqorǵanda 2021 jyldyń aıaǵynan 2022 jyldyń basyna deıin kezekke qoıý 19 sanat boıynsha júrgizildi. Atap aıtqanda, kezek kútkender elektrondyq bazaǵa engizilmedi. Al «KEZEKTE» boıynsha elektrondyq bazalar tek 6 sanat boıynsha ǵana júrgiziledi. Nátıjesinde osyndaı túsiniksiz jaǵdaı boldy», - dep túsindirdi Beıbit Isabaev Ortalyq kommýnıkatsııalar qyzmetinde ótken brıfıngide.
Osyǵan baılanysty kezek reti saqtalmaı, adamdardyń kezegi keıinge syrǵyǵan. Saldarynan qala turǵyndary narazylyq bildirip, másele kótere bastady. Sonymen qatar, tekserý kezinde Taldyqorǵanda 1218 páterdiń zańsyz berilgeni beligili boldy.
«Eń ókinishtisi zań talaptaryn saqtamaǵandardyń arasynda memlekettik qyzmetshiler, jýrnalıster, quqyq qorǵaý organdarynyń qyzmetkerleri, sportshylar men ártister de bar. Olar barlyq zańnamalyq aktilerdi óreskel buza otyryp, kezekti aınalyp ótip, páterler alǵan. Biz olarmen bir jyl boıy kúresip kelemiz. Men naqty aty-jónderin ataǵym kelmeıdi», - dedi oblys ákimi.
Beıbit Isabaevtyń aıtýynsha, búginde 500-ge jýyq páter zańdastyrylǵan. Al, 10-ǵa jýyq baspana máselesimen Sybaılas jemqorlyqqa qarsy qyzmet agenttigi aınalysyp jatyr. Taǵy 100-den astam páterge qatysty is sotta qaralýda.
«Taǵy bir aıqyn dálel - 2002-2003 jyldardan bastap 2022 jylǵa deıin júrgizilgen kezekke qatysty barlyq qaǵaz qujattar men olardyń elektrondy nusqalary joıylǵan. Osylaısha, júıeden 1700-ge jýyq adam shyǵarylyp tastaǵan. Biz bir jyl boıy osy kezekti qalpyna keltirýmen aınalystyq. Munyń sebepsiz jasalmaǵanyn ózińiz túsinip otyrsyz. Sondyqtan bul problemamen bizdiń quqyq qorǵaý organdary aınalysady, kináli adamdar jazalanady», - dep túıindedi ol.
Ákim zańdastyrylǵan páterler naqty muqtaj jandarǵa qaıta bólinetinin atap ótti.
