Taldyqorǵanda medıtsına qyzmetkerlerine 16 páter berildi

Qala ákimi Ǵalymjan Raıyluly «Qala kúni» merekesine oraı, jyl saıynǵy dástúr boıynsha qalanyń damýy men órkendeýine eleýli úlesin qosqan azamattarǵa, atap aıtqanda Qazaqstannyń jáne Almaty oblysynyń sport salasyna eńbegi sińgen azamat Rahymbek Tólendıevke, B.Rımova atyndaǵy Taldyqorǵan drama teatrynyń ártisi Máken Nurmuhambetovaǵa, Taldyqorǵan obaǵa qarsy kúres stantsııasy dırektorynyń orynbasary Valerıı Sapojnıkovke, zeınetker Habdýlla Ibraıymhanovqa , JLC sút« JShS-nyń dırektory Olga Bogdanovaǵa «Taldyqorǵan qalasynyń qurmetti azamaty» ataǵyn berip, arnaıy kýáligi men tósbelgisin tabystady.

Osydan keıin oblys ákiminiń orynbasary Rýstam Alı qala turǵyndaryn ataýly kúnimen quttyqtap, jetisýlyqtardyń densaýlyǵyn saqtaý, koronavırýsqa qarsy turýǵa baǵyttalǵan sharalar týraly aıtyp ótti.

Quttyqtaýynan keıin R. Alı 16 medıtsına qyzmetkerine páter kiltterin tabystady. Atap aıtqanda, №1 qalalyq emhananyń onkolog dárigeri men jalpy tájirıbe dárigeri, №2 qalalyq emhananyń ýchaskelik pedıatr dárigeri men jalpy tájirıbe dárigeri, qalalyq kópsaly aýrýhananyń anestezıolog-reanımatolog dárigeri, ýltra dybystyq zertteý dárigeri, travmatolog-ortoped dárigeri, ftızıopýlmonologııalyq ortalyqtyń gospıtaldi epıdemıology, oblystyq perınataldy ortalyqtyń akýsher-gınekolog dárigeri, oblystyq kópsalaly balalar aýrýhanasynyń pedıatr-gematolog dárigeri, oblystyq kópsalaly klınıkanyń patologomorfolog dárigeri, oblystyq aýrýhananyń reanımatsııa bólimshesiniń meńgerýshisi jańa baspanaǵa ıe boldy.

Jyl sońyna deıin medıtsına qyzmetkerlerine taǵy 48 úı berý josparlanyp otyr.

Osydan keıin qala ákimi Ǵ.Ábdiraıymov Taldyqorǵan qalasynyń Qala kúni merekesi aıasynda uıymdastyrylǵan túrli baıqaýlarda jeńimpaz atanǵan jastardy marapattap, baǵaly syılyqtar tabystady.

Qala kúnine arnalǵan saltanatty sharany qalanyń óner ujymdarynyń oryndaýyndaǵy shaǵyn kontserttik baǵdarlama túıindedi.