Taldyqorǵanda massajıst mamandyǵyn meńgergen zaǵıp jandarǵa dıplom tapsyryldy
TALDYQORǴAN. QazAqparat - Taldyqorǵanda massajıst mamandyǵyn meńgergen zaǵıp jandarǵa dıplom tapsyryldy. Jańa bólimniń alǵashqy 7 túlegine dıplom tapsyrý rásimi oblystyq teatrdyń úlken sahnasynda sán-saltanatpen ótti, dep habarlaıdy QazAqparat tilshisi.
Endi túlekter emdeý-saýyqtyrý mekemelerine baryp, massajıst mamandyǵy boıynsha qyzmet etedi. Mamandardyń aıtýynsha, zaǵıp jandardyń saýsaǵynda sezimtaldyq qasıet basym. Sondyqtan olardan jaqsy maman shyǵady. 
«Osy massajıst bóliminiń ashylǵany, bizder sııaqty jandarǵa jańa múmkindik berdi. Biz jumys jasaǵymyz keledi. Osy massajben kóptegen balalar óziniń osy ómirdegi ornyn taýyp, jumysyn jasaıdy», deıdi kolledj bitirýshi túlek Qýanysh Qapanov. 
«Al jańa oqý jylynda qabyldanatyn talapkerlerdiń qatary eki ese kóp bolatyn syńaıly. Óıtkeni respýblıkanyń ár aımaǵynan ótinishter túsýde», - deıdi kolledj basshylyǵy. 
Aıta ketý kerek, eki jyl buryn Taldyqorǵan medıtsınalyq kolledjinde zaǵıptarǵa arnalǵan bólim ashylǵan bolatyn. Jańalyqty qýana qabyldaǵan talapkerler oǵan oqýǵa túsip, massajıst mamandyǵynyń qyr-syryn úırendi. Oqý ǵımaratynyń birinshi qabatynan olarǵa arnaıy aýdıtorııa bólindi. Janynda lıngofon kabıneti bar. Sabaq kóbinese aýdıotaspalardy tyńdaý arqyly júrgizildi.
