Taldyqorǵanda mas júrgizýshi áıel adamdy eki balasymen birge qaǵyp ketti
TALDYQORǴAN.QazAqparat - Taldyqorǵanda ishimdik ishken kólik júrgizýshisi jaıaý júrginshiler jolaǵynda áıel adamdy eki balasymen qaǵyp ketti. Oqıǵa 1 mamyr kúni bolǵan, dep habarlaıdy QazAqparat tilshisi.
«Sýbarý Forester» kóliginiń 54 jastaǵy júrgizýshisi ýaqytsha ustaý ızolıatoryna qamaýǵa alyndy. Sondaı-aq, ol kólikti qujatsyz júrgizgen. Mashınanyń memlekettik nomeri de jalǵan bolyp shyqty. Al zardap shekkender túrli dene jaraqatymen oblystyq aýrýhanaǵa jetkizildi.
«Anyqtalǵandaı júrgizýshi 2017 jyly kólikti ishimdik iship júrgizgeni úshin jaýapkershilikke tartylyp, kólik júrgizý kýáliginen aıyrylǵan. Sonymen qatar, temir tulpar Qyrǵyzstannan jetkizilgen. Jáne oǵan jalǵan memlekettik nomerdi qoldanǵan. Qazir osy faktige oraı Qylmystyq is qozǵaldy. Іs Taldyqorǵan qalalyq polıtsııasynyń qaraýynda», - dep málimdedi oblystyq Polıtsııa departamenti baspasóz qyzmetinen.
