Taldyqorǵanda mal izdep shyǵyp joǵalyp ketken qoıshy aman tabyldy
TALDYQORǴAN. QazAqparat - Taldyqorǵanda qoı izdep shyǵyp, joǵalyp ketken baqtashy tabyldy, dep habarlaıdy QazAqparat tilshisi.
«2020 jylǵy 29 sáýir kúni tańǵy 07 saǵat 15 mınýtta Almaty oblysy TJD-ǵa Taldyqorǵan qalasynyń «Qyzyl tas» saıajaıynyń turǵyny joǵalǵandyǵy jóninde habar tústi. 1972 jylǵy azamat 28 sáýir kúni tańǵy saǵat 7 shamasynda úıinen joǵalyp ketken qoılardy izdestirýge shyǵyp, qaıtyp oralmaǵan. Іzdestirý-qutqarý jumystary Almaty oblysy TJD (10 adam, 2 birlik tehnıka jáne izdeý ıti), Almaty oblysy PD (5 qyzmetker jáne 1 birlik tehnıka) qyzmetkerleriniń kúshimen júrgizildi. Sondaı-aq, izdeý jumysyna joǵalǵan adamnyń týystary men «Kóshpendiler» avtoáýesqoılarynyń (7 adam jáne 3 birlik tehnıka) eriktileri qatysty», - delingen Almaty oblystyq TJD baspasóz qyzmeti taratqan habarlamada.
Vedomstvonyń málimetinshe, búgin 11 saǵat 50 mınýtta izdestirý jumystary sátti aıaqtaldy. Adasqan azamat Taldyqorǵan qalasynyń «Mereke» saıajaıynyń mańyndaǵy taýly aımaqtan tabyldy. Densaýlyǵy jaqsy, medıtsınalyq kómekke muqtaj emes.
