Taldyqorǵanda qysqy sport túrlerine arnalǵan sport kesheniniń qurylysy bastaldy
TALDYQORǴAN.QazAqparat – Taldyqorǵanda qysqy sport túrlerine arnalǵan sport kesheniniń qurylysy bastaldy, - dep habarlaıdy QazAqparat tilshisi.
Jeke menshik qarjyǵa salynyp jatqan nysanda sportshylar shaıbaly hokkeı, mánerlep syrǵanaý, short-trek sporty sııaqty sport túrlerimen aınalysatyn bolady. Jalpy Almaty oblysynda 3700-den astam ár túrli sport nysany halyqqa qyzmet kórsetýde. Óńir turǵyndarynyń 32 paıyzy buqaralyq sportqa jumyldyrylǵan. Sońǵy úsh jylda 13 dene shynyqtyrý saýyqtyrý kesheni qoldanysqa berildi. Taǵy tórt keshenniń qurylysy júrip jatyr. 10 myń balany qalaǵan sport túrimen aınalysýyna jaǵdaı jasalyp, 1 mlrd teńge qarjy qarastyrylyp otyr. Jalpy bıyl Jetisý óńiriniń sport salasyn damytýǵa 21,5 mlrd teńge qarjy bólingen.
«Bıylǵy jyly qoldanysqa taǵy bir dene shynyqtyrý-saýyqtyrý keshenin berý josparlanýda. Ol Aqsý aýdany Jansúgirov aýylynda ashylady. Kelesi jylǵa Uıǵyr aýdanynyń Shonjy aýylynda jáne Alakól aýdanynyń Dostyq kenti men Lepsi aýylynda sport keshenderi ashylady degen josparlanýda», - dedi Almaty oblystyq dene shynyqtyrý jáne sport basqarmasy basshysynyń orynbasary Almat Úshkempirov.
Esterińizge sala keteıik, osydan bir aı buryn Taldyqorǵanda halyqaralyq standarttaǵy júzý basseıni ashylǵan bolatyn.
