Taldyqorǵanda qurylysy toqtap turǵan 5 úıdiń máselesin depýtattar baqylaýǵa aldy
TALDYQORǴAN. QazAqparat - Taldyqorǵan qalasynda «Nurly jol» baǵdarlamasy aıasynda qolǵa alynyp, keıin aıaqtalmaı qalǵan 5 úıdiń máselesin Májilis depýtattary óz baqylaýyna aldy, dep habarlaıdy Qazaqparat tilshisi.
Almaty oblysyna issaparmen barǵan bir top Májilis depýtattary óńirde memlekettik baǵdarlamalardyń oryndalýyn pysyqtady. Oblysta «Nurly jer» baǵdarlamasy aıasynda qurylys qarqyn alǵan. Tek Taldyqorǵan qalasy boıynsha bıyl 700-den astam páter el ıgiligine berilýi tıis. Halyq qalaýlylary 64 páterli úıdi salyp jatqan qurylysshylarmen kezdesip, jumys barysymen tanysty.
Depýtattar sondaı-aq «Nurly jol» baǵdarlamasy aıasynda qolǵa alynyp, biraq toqtap qalǵan qurylys nysandarynda da bolyp qaıtty. Ulttyq qordan bólingen qarjyǵa 5 kópqabatty turǵyn úı qurylysy 2015 jyly bastalǵan bolatyn. Alaıda tapsyrys berýshi men merdigerdiń ózara kelispeýshiligi saldarynan jumys áli kúnge deıin toqtap tur. Halyq qalaýlylary bul máseleni jiti qadaǵalap otyrǵandaryn jetkizdi.
Májilis depýtaty Ábdimanap Bekturǵanov bul jobaǵa Ulttyq qordan 2,4 mlrd teńge qarajat bólingenin jáne jumystyń aıaqsyz qalǵany týraly qulaǵdar ekenin málimdedi. Halyq qalaýlysy sot sheshimi shyqqannan keıin nysandardy qala ákimdigine qaıta tapsyryp qurylysty jalǵastyrý qajettigin alǵa tartty.
