Taldyqorǵanda Qurban aıt merekesinde 70 taksı tegin qyzmet kórsetedi
Bul kólikterge «Qurban aıttyń qurmetine tegin taksı» degen arnaıy plakattar japsyrylady.
«Tegin taksıler Qurban aıttyń alǵashqy kúnderi ıaǵnı, birinshi jáne ekinshi kúnderi halyqty tegin tasymaldaıdy. Bul kólikter qalanyń kez-kelgen jerlerinde júredi. Eger de úshinshi jáne tórtinshi kúnderi halyq tegin taksıge suranys tanytsa, bizdiń adamdar ol qyzmetti kórsetýge daıyn. Ol úshin ortalyǵymyz «Iman» meshitine habarlasýy kerek.Al qoǵamdyq kólikter aıttyń birinshi kúni halyqty tegin tasymaldaıdy. Eskerte ketetin jaıt, bizdiń aktsııaǵa arnaıy plakattar jazylǵan avtobýstar ǵana qatysady. Turǵyndar osy jaıtqa mán berse deımiz», - deıdi «Iman» ortalyq meshitiniń bas ımamy Serikhan Yrymhanuly.
Sondaı aq ımamnyń aıtýynsha, qurban aıt merekesinde túrli sharalar da uıymdastyrylady. Máselen, Taldyqorǵandaǵy atshabarda at jáne ulttyq oıyn túrlerinen jarys ótedi. Alaman báıgeniń bas júldesi 500 myń teńge. Bul shara qyrkúıektiń biri kúni saǵat 15:00 de bastalady.Sondaı-aq ol jerde halyqqa palaý, túrli táttiler men syılyqtar tegin taratylady. Al sol kúni keshkisin jetisýlyqtar Qaratal ózeniniń boıyndaǵy saıabaqta tamasha otshashýdy kórip, túrli oıyndarǵa qatysyp, dástúrli dinimiz týraly maǵlumattar ala alady. Bul qurban aıttyń alǵashqy kúnindegi sharalardyń bir parasy ǵana. Budan ózge de mereke kúnderi túrli qaıyrdylyq aktsııalar ótetin bolady.