Taldyqorǵanda quny 8 mln teńgeniń jańadan salynǵan aıaldamasy órtenip ketti
TALDYQORǴAN.QazAqparat - Taldyqorǵan qalasyna qarasty Erkin aýyldyq okrýginde 8 mln teńgege turǵyzylǵan aıaldama órtenip ketti, dep habarlaıdy QazAqparat tilshisi.
Bul aıaldama ákimdik ǵımaratyna qarama-qarsy ornalasqan.
«Bilál Súleev kóshesindegi aıaldamada órttiń qaıdan shyqqany belgisiz. Barlyq shyǵyndardy merdiger mekemeniń ózi tóleıtin bolady. Sebebi bul aıaldama áli paıdalanýǵa berilmegen», - dedi Taldyqorǵan qalasy ákiminiń baspasóz hatshysy Danııar Janys.
Baspasóz hatshysynyń aıtýynsha, qazirgi ýaqytta mundaı aıaldamanyń 9-y salynǵan. Al órtengen aıaldama onynshysy edi, biraq áli qoldanysqa berilmegen bolatyn.
«Tutastaı alǵanda barlyǵy 20 jańa aldama salynýy josparlanyp otyr», - dedi D.Janys.
Esterińizge sala keteıik, biz buǵan deıin Taldyqorǵanda 11 mln teńgeniń aıaldamasy jarty jyldan beri istemeı turǵanyn habarlaǵan bolatynbyz.
