Taldyqorǵanda quny 540 mln AQSh dollaryn quraıtyn iri joba júzege asýda
TALDYQORǴAN.QazAqparat - Taldyqorǵan qalasynda jobalyq quny 540 mln AQSh dollary bolatyn jylý-elektr ortalyǵynyń qurylysyna 80 gektar jer bólinip, qazir nysannyń tehnıka-ekonomıkalyq negizdemesi ázirlenip jatyr.
Bul týraly búgin Almaty oblysynyń ákimi Amandyq Batalovtyń tóraǵalyǵymen ótken jıynda oblys ákiminiń orynbasary Aıdarbek Baıjanov aıtty, dep habarlaıdy QazAqparat óńir basshysynyń baspasóz qyzmetine silteme jasap.
Osydan bir jarym jyl buryn oblys ákimdigi men «Global Generation» JShS arasynda atalmysh ınvestıtsııalyq joba boıynsha ózara yntymaqtastyq týraly memorandýmǵa qol qoıylǵan bolatyn. Jıynda osy joba negizinde atqarylyp jatqan sharalar pysyqtaldy.
Oblys ákiminiń orynbasary A. Baıjanovtyń aıtýynsha, JEO qurylysyna qaladan 80,0 ga jer bólinip, 200 gektar jer qaldyqtardy jınaqtaıtyn oryn úshin rezervke qoıylǵan. Qazirgi kezde jobalyq top qurylyp, jobany júzege asyrýdyń jol kartasy ázirlengen. Qolǵa alynyp otyrǵan tehnıka-ekonomıkalyq negizdemeniń daıyndalýy úshin memlekettiń úlesi - oblystyq bıýdjetten 2 mlrd. teńgeden astam qarjy qarastyrylýy qajettigi eseptelgen.
Osy jıynda sóz alǵan «Global Generation» JShS aktsıoneriniń ókili Rýstam Baıalıev jobalyq top apta saıyn bas qosyp, týyndaǵan máselelerdi der kezinde sheship otyrsa degen usynysyn jetkizdi. Sonymen qatar tıisti saraptaý-taldaý esep-qısabyn ázirleý maqsatynda oblystyq tıisti qurylymdardan suratatyn qajetti aqparattardy ýaqtyly usynyp, qoldaý kórsetýdi surady. Sondaı-aq jobany júzege asyrýdyń aǵymdaǵy jaıy týraly keńinen baıandady.
Jalpy, búgingi kúni oblys ortalyǵyn jylý júıesimen qamtamasyz etip otyrǵan «Basqýat» qazandyǵynyń júktemesi 90 %-ke jetken. Taldyqorǵanda jyl saıyn salynatyn áleýmettik nysandar men turǵyn úıler sanynyń ósýine sáıkes bul júkteme áli de arta túsedi. Osyǵan baılanysty kóshe ishilik qazandyqtar da qaıta jańǵyrtýdan ótkizilgen bolatyn. «Basqýattyń» úzdiksiz jumys istep turǵanyna 40 jylǵa jýyq ýaqyt bolǵanyn eskersek, jańa JEO-nyń salynýy Taldyqorǵan úshin ekonomıkalyq jaǵynan tıimdi ári qaýipsizdiktiń kepili bolmaq. Qurylysy 4 jylǵa sozylyp, ózin-ózi 12 jylda aqtap shyǵady dep kózdelgen JEO iske qosylǵanda nysan 540 adamdy jumyspen qamtymaq. Ortalyqtyń qýattylyǵy 440 GKal/saǵ bolady dep josparlanyp otyr.
Jıyndy qorytyndylaǵan oblys ákimi Amandyq Batalov osy jobany júzege asyrýǵa jaýapty mekemeler men qala ákimdigine naqty tapsyrmalar berdi.
«Birinshiden, óńir ekonomıkasy úshin asa iri kólemde ınvestıtsııa quıatyn, 500-den astam jumys ornyn ashatyn, oǵan qosa qalany jylýmen jáne elektrmen qatar qamtı alatyn mundaı asa iri ınvestıtsııalyq jobany júzege asyrýǵa belsene kirisýimiz kerek. Memlekettiń osy jobanyń júzege asyrylýyna múddeliligin bildiretin kepildik retinde TEN úshin qajet somany qarastyramyz. Osy is barysynda ınvestorlarǵa qajetti kómektiń bárin kórsetip, birlesip jumys jasaýymyz kerek. Eń aldymen, memlekettik-jekemenshik seriktestik boıynsha kelisimshartty jyldam ázirlep, ár tarap - atqarýshy organ men ınvestor óziniń naqty mindetterin aıqyndap alýy qajet. Sizderge osy jumysty shıratýdy tapsyramyn. Atqarylǵan ister týraly maǵan apta saıyn málimet berip otyratyn bolasyzdar», - dedi A. Batalov.
