Taldyqorǵanda quqyq qorǵaý qyzmetin kórsetetin ortalyq ashyldy

Munda «bir tereze» qaǵıdasy boıynsha oblys turǵyndarynyń sapaly kómek alýyna múmkindik jasalǵan. Ortalyqta joǵary sanatty zańgerler, advokattar, medıatorlar, notarıýstar, polıtsııa jáne probatsııa qyzmetkerleri túrli keńesterin berip, kómegin kórsetedi. Jańa ortalyqtyń ashylýymen óńir turǵyndaryn oblys ákimi Amandyq Batalov quttyqtady, - dep habarlaıdy Almaty oblysy ákiminiń baspasóz qyzmetinen.

- Memleket basshysy N.Á.Nazarbaev óz sózinde: «Memlekettik organdar, sonyń ishinde quqyq qorǵaý qyzmeti jumysynyń tıimdiligin kórsetetin basty kórsetkishteriniń biri - onyń halyq úshin ashyqtyǵy jáne qoljetimdi bolýy», - dep atap ótken bolatyn. Sol sebepti, búgin biz óte qajetti sharanyń ashylýyna kýá bolyp otyrmyz. Sizderge búginnen bastap quqyq qorǵaý qyzmetteri ortalyǵy kómek kórsetetin bolady. Onyń jumysy azamattardyń aryz-shaǵymdary men ótinish-tilekterin jyldam ári sapaly qaraýǵa, ákimshilik kedergilerdi boldyrmaýǵa jáne azamattardyń quqyq qorǵaý, memlekettik organdarǵa degen senimin arttyrýǵa baǵyttalǵan, - dep atap ótti óńir basshysy.

Saltanatty sharada Almaty oblysynyń prokýrory Azamat Jylqybaev óz sózinde ortalyqty ashýdyń arqasynda azamattarǵa eń qajetti degen sala mamandary bir ǵımaratta otyryp, qajetti kómekti kórsetetin jáne bul qyzmet túri tutynýshylar úshin óte yńǵaıly bolatyndyǵyn atap ótti. Sondaı-aq osy ortalyqtyń ashylýyna qoldaý bildirgeni úshin oblys basshylyǵyna alǵysyn bildirgen oblys prokýrory, búginnen bastap ortalyqqa júgingen azamattar sapaly quqyqtyq qyzmetti paıdalanýǵa tolyqtaı múmkindigi baryn jetkizdi.

Jańa ǵımarattyń lentasyn qııý saltanatynan keıin sharaǵa qatysýshylar men qonaqtar ortalyqtyń jumysymen tanysyp shyqty. Munda prokýrorlar men ishki ister departamenti qyzmetkerleriniń jumys kabınetterinen ózge notarıýs, advokat, medıator, psıholog, ádilet jáne probatsııa qyzmeti mamandarynyń jumys kabınetteri qarastyrylǵan. Barlyq keńes berý qyzmeti - tegin. Sondaı-aq bul jerde prokýrorlar azamattardyń ótinishterin qabyldap, túrli máselelerdiń sheshimin tabýǵa baǵyt-baǵdar berip, jolyn kórsetetin bolady.

Eskerte ketetin bolsaq, ortalyq ǵımaratyn qalpyna keltirý jáne qajetti arnaıy qural-jabdyqtarmen qamtamasyz etý úshin oblystyq bıýdjetten 47 mln. teńge qarajat bólingen bolatyn.

Ortalyqta halyqqa sapaly qyzmet kórsetý úshin barlyq qajetti jaǵdaılar jasalǵan. Atap aıtqanda, qabyrǵalary áınekten turǵyzylǵan kabınetter, kútýshilerge arnalǵan jaıly kútý oryndary, aýdıo jáne beıne tirkeý qurylǵylary ornatylǵan, kelýshilerdi qajetti aqparattardan qulaǵdar etý maqsatynda úlken ekrandar ornatylǵan. Sonymen qatar ortalyqta beıne baılanys arqyly azamattardyń ótinishterin tıisti organdarǵa joldaýǵa arnalǵan kabınetter de bar.

Ortalyqpen tanysýdan keıin oblys ákimi A.Batalov ortalyq qyzmetkerlerine halyqtyń múddesi úshin tabysty ári jemisti eńbek etýlerin tiledi.