Taldyqorǵanda qos bilim mekemesinde IT ortalyq ashyldy
TALDYQORǴAN. QazAqparat - Taldyqorǵandaǵy polıtehnıkalyq jáne agrotehnıkalyq kolledjdiń janynan IT ortalyq ashyldy. "Tsıfrly Qazaqstan" baǵdarlamasy aıasynda qolǵa alynǵan joba "Nur Otan" partııasynyń oblystyq fılıalynyń uıytqy bolýymen júzege asty, dep habarlaıdy QazAqparat tilshisi.
Oblystaǵy alǵashqy IT ortalyqta kolledj muǵalimderi elektrondy úkimet portalymen jumys istep, jańa tehnologııalardyń múmkindikterin ıgeredi. Sondaı-aq, robototehnıkanyń negizderin meńgeretin bolady. Mamandardyń aıtýynsha, ázirge eki IT synybynda 800-den asa adamdy oqytý josparlanǵan. Jańadan ashylǵan ortalyqta IT tehnologııany jetik meńgergen oqytýshylar sabaq beredi.
«Qazir oqýǵa oblys aýdandaryndaǵy kolledj muǵalimderi qabyldandy. Olar aqparattyq tehnologııalar boıynsha bilimin arttyratyn bolady. Ázirge kýrsta ártúrli jastaǵy, ártúrli deńgeıdegi 20 adam oqyp jatyr. Qatarynda tájirıbeli ustazdar da bar. Jyl sońyna deıin 80 adamdy oqytý josparlanyp otyr. Baǵdarlamaǵa sáıkes, barlyǵyn oqytyp úlgeremiz dep oılaımyn», -dedi Taldyqorǵandaǵy polıtehnıkalyq kolledj dırektorynyń orynbasary Raıgúl Abdoldanova.
Oblystaǵy "IT mamandardy daıarlaý" men jańa tehnologııalardy meńgerý baǵdarlamasy 2020 jylǵa deıin jalǵaspaq. Osy ýaqyt aralyǵynda 8000-nan asa bala men 50-ge jýyq kásibı mamandy daıyndaý josparlanǵan. Osyǵan sáıkes, oblystyq partııa qyzmetkerleri aýdandarda da aıtı synyptaryn ashyp, ony qajetti qural jabdyqtarmen qamtý jumystaryn qolǵa alýdy josparlap otyr.
