Taldyqorǵanda koreıalyq dáriger tegin ota jasady
TALDYQORǴAN. QazAqparat - Taldyqorǵanda 45 jyldyq eńbek ótili bar koreıalyq dáriger sút bezi qaterli isigine shaldyqqan 2 áıelge tegin ota jasady, dep habarlaıdy QazAqparat tilshisi.
Inhva ýnıversıteti janyndaǵy áıelder onkologııalyq ortalyǵynyń dırektory Pek Nam Sonnyń otasyn telemedıtsına arqyly aýdan, qalalardaǵy onkologtar men mammologtar kórip otyrdy. Osylaısha álemdik deńgeıde moıyndalǵan bilikti maman óz tájirıbesimen bólisti.
Almaty oblysynyń ortalyǵyna medıtsına ǵylymdarynyń doktory Pek Nam Son arnaıy shaqyrtýmen kelgen. Onkolog dáriger bul jolǵy saparynda jergilikti medıtsına salasynyń qyzmetkerlerimen kezdesip, sheberlik dárisin ótkizdi. Sút jáne qalqansha beziniń qabynýyn emdeý joldary talqylanǵan basqosýda sheteldik meıman bilgenimen bólisip, aqyl-keńesin aıtty. Qatysýshylar tarapynan qoıylǵan san túrli saýaldarǵa jaýap berdi. 45 jyldyq eńbek ótili bar dáriger koreı, japon jáne amerıka medıtsınalyq qaýymdastyqtarynyń múshesi.
