Taldyqorǵanda kópqabatty úıde jarylys bolyp, eki adam zardap shekti
TALDYQORǴAN. QazAqparat - Taldyqorǵanda gaz-aýa qospasynan jarylys bolyp, eki adam zardap shekti, dep habarlaıdy QazAqparat tilshisi.
Almaty oblystyq Tótenshe jaǵdaılar departamenti baspasóz qyzmetinen málim etkendeı, oqys oqıǵa eki qyzmetker gazdyń esepteýish quralyn aýystyryp jatqanda bolǵan. Resmı málimet boıynsha, gaz ortalyqtandyrylǵan júıege qosylǵan.
«Oqıǵa Taldyqorǵandaǵy «Jetisý» yqshamaýdanynda boldy. Keshki saǵat 19:00 shamasynda bes qabatty úıden 15 adam qaýipsiz jerge kóshirildi. Onyń 6-aýy – balalar. Oqıǵa ornyna tótenshe jaǵdaılar qyzmetiniń 21 qyzmetkeri men jedel járdem, polıtsııa ókilderi jáne 7 tehnıka jóneltildi. Zardap shekken eki qyzmetkerdiń jaǵdaıy turaqty. Olar «Tavıdı» JShS-nyń jumysshylary. Gaz-aýa qospasynyń jarylysynan órt týyndaǵan joq. Terezeleri ǵana syndy. Basqa páterlerge zalal kelgen joq», - dedi atalǵan vedomstvonyń baspasóz qyzmetiniń ókili Azamat Jurtbaev.
