Taldyqorǵanda kólikti ruqsatsyz minip ketken áıel mas bolyp shyqty
TALDYQORǴAN.QazAqparat - 28 naýryzda Taldyqorǵandaǵy qonaq úılerdiń birinde avtoturaqta turǵan «Toıota-Kamrı» kóligin belgisiz bireý minip ketken. Bul jóninde aqparat qalalyq ІІB kezekshi bólimine tústi, dep habarlaıdy QazAqparat tilshisi.
Beınebaqylaý kameralary kómegimen urlanǵan kólik qaladan shyǵyp bara jatqan jerinde anyqtaldy. Jol-patrýldik polıtsııa qyzmetkerleri jedel áreket etip izdeýdegi kólikti az ýaqytta taýyp, toqtatqan. Tártip saqshylary avtokólik tizgininde Baqtybaı aýylynda turatyn 34 jastaǵy áıeldiń mas kúıinde otyrǵanyn anyqtap, qamaýǵa aldy. Qazirgi tańda tergeý amaldary júrip, kúdikti óz kinásin moıyndap túsinikteme berýde. Atalǵan fakt boıynsha QR QK 200-shi baby boıynsha is qozǵalyp, kólik ıesine qaıtaryldy. Jalpy jyl basynan beri oblystyq polıtsııa qyzmetkerleriniń kúshimen 43 avtokólik aıdap ketý faktisi tirkelgen.
