Taldyqorǵanda kóligimen adam qaǵyp, oqıǵa ornynan qashyp ketken júrgizýshi ustaldy
TALDYQORǴAN. QazAqparat - Taldyqorǵanda polıtseıler kóligimen er adamdy basyp ketken júrgizýshini ustady, dep habarlaıdy QazAqparat tilshisi.
21 qazan kúni Qaratal ózeniniń ústindegi kópirde velosıped mingen adamdy kólik qaǵyp ketkeni týraly habar kelip túsken. 81 jastaǵy jergilikti turǵyn oqıǵa ornynda qaza tapqan, al ony basyp ketken avtomashına izin sýytqan.
Krımınalıster oqıǵa ornynan plastık bamperdiń qaldyǵyn tapqan, sol arqyly avtomashınanyń markasy men túsin anyqtady.
«Ol Mercedes-Benz markaly mashına bolyp shyqty. 42 jastaǵy kúdiktiniń tulǵasy anyqtaldy. Ol kóligin úıindegi garajǵa qaldyryp, ózi Almatyǵa ketip qalǵan. Mashınanyń aldyńǵy jaǵy zaqymdalǵan. Qazir kúdikti ustalyp, qalalyq polıtsııaǵa jetkizildi», - dep málimdedi Almaty oblysy PD baspasóz qyzmeti.
Kúdikti qart adamdy qaǵyp ketken kezde mas bolǵanyn moıyndady. «QR Qylmystyq kodeksiniń 345-baby («Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy») jáne 347-baby («Jol-kólik oqıǵasy bolǵan jerden ketip qalý») boıynsha sotqa deıingi tergep-tekserý júrip jatyr», - deıdi polıtsııa qyzmetkerleri.
Avtory: Hasan Espanov
