Taldyqorǵanda qoqys suryptaý tsehy ashyldy
TALDYQORǴAN.QazAqparat - Taldyqorǵanda qala kúni merekesi qarsańynda qoqys suryptaý tsehy ashyldy. «ADAL DAMU Capital» JShS qoqys óńdeý tsehynyń jyldyq qýaty 100 myń tonna. 20 adam turaqty jumysqa ornalasty, dep habarlaıdy QazAqparat tilshisi.
Kompanııa jetekshisi Erlan Dúısebaevtyń aıtýynsha, bul tseh úlken jobanyń tek birinshi kezeńi ǵana.
«Qoqys óńdeý zaýytynyń jalpy quny 1 mlrd 400 mln teńge. Alǵashqy kezeńge 250 mln teńge ınvestıtsııa quıyp otyrmyz. Nátıjesinde biz temir qaldyqtaryn, plastmas jáne tselofan buıymdaryn, sondaı-aq qaǵaz qaldyqtaryn óńdeıtin bolamyz. Óńdelgen buıymdardy biz shıkizat retinde tıisinshe zaýyttarǵa ótkizemiz. Bul jobaǵa Almaty oblysynyń ákimi Amandyq Batalov erekshe mán berip, barynsha qoldaý tanytyp otyr. Zaýyt tolyq qýatymen jumys istegende 170 adamǵa turaqty jumys tabylatyn bolady»,- deıdi ınvestor.
Tsehtyń ashylýyna arnaıy kelgen Taldyqorǵan qalasy ákiminiń orynbasary Nurlan Mámbetjanov mundaı kásiporynnyń ekologııany saqtaýdaǵy mańyzyna toqtaldy.
«Qaladan kúnine 80-100 tonna qoqys shyǵady. Olardy qaıta iske jaratý máselesin Elbasynyń ózi kótergen bolatyn. Bul - Prezıdent tapsyrmasynyń naqty júzege asqanyn kórsetedi. Taldyqorǵan - taza qala. Mundaı óndiris oryndary qalanyń tazalyǵyn tipten joǵary deńgeıge kóteredi»,- dedi qala basshysynyń orynbasary.
Aıta ketý kerek, Taldyqorǵanda qala kúnine arnalǵan merekelik sharalar 8-shi qyrkúıekten bastaldy. Túrli shyǵarmashylyq baıqaýlar, sheberlik sabaqtary, retro kontsertter men sporttyq saıystar, tanymal tulǵalarmen kezdesýler, áleýmettik nysandardyń ashylýy, kásiporyndardyń tusaýkeserleri sekildi kóptegen sharalar bıylǵy merekeniń sánin kirgizetin bolady. Al, negizgi mereke 30-qyrkúıekte saǵat 10-00-de qalanyń ortalyǵynan bastalyp, Jastar sport saraıynyń mańy men «Jastar» saıabaǵynda jalǵasady.
