Taldyqorǵanda qoǵamdyq orynda qorqor shekken qyz ben jigitke aıyppul salyndy
TALDYQORǴAN. QazAqparat- Almaty oblysynyń polıtseıleri áleýmettik jelilerge monıtorıng júrgizý barysynda oblys ortalyǵyndaǵy qoǵamdyq oryndardyń birinde túngi ýaqytta eki azamattyń kalıan shegip otyrǵanyn baıqaǵan, dep habarlaıdy QazAqparat tilshisi.
Oqıǵa ornyna jedel jetken tártip saqshylary qos azamatqa da tyıym salynǵan orynda temeki buıymdaryn, onyń ishinde qorqorǵa arnalǵan temekini tutynǵany úshin ákimshilik hattama toltyrdy.
«Jergilikti blogerlerdiń biriniń paraqshasynda qalamyzdyń kórikti jerleriniń birinde jigit pen qyzdyń kalıan shegip otyrǵany týraly aqparat shyqty. Qoǵamdyq tártipti buzý deregi boıynsha atalǵan orynǵa jedel jetken tártip saqshylary 18 jastaǵy jigit pen 21 jastaǵy boıjetkenge QR Ákimshilik quqyq buzýshylyqtar týraly» kodekstiń 441-babyna sáıkes hattama toltyrdy»,- dep atap ótti Taldyqorǵan qalalyq Polıtsııa basqarmasynyń bastyǵy polıtsııa polkovnıgi Asqar Nursapa.
Óz kezeginde, tártip saqshylary turǵyndardy qoǵamdyq tártipti saqtaýǵa jáne koronavırýs indetiniń jappaı taralýyna baılanysty sanıtarlyq qorǵaný normalaryn da qatań ustanýǵa shaqyrady.
